Qaraǵandy oblysynda egin jinaý naýqany júrip jatyr. Egistikterde jumys ádettegiden on kún buryn bastaldy. Jazda jaýyn-shashyn kóp bolmasa da, sharýalar astyqtyń sapasy jaqsy bolady deidi, dep habarlaidy "Ult aqparat".
Jeńis Qasymbek Osakarov jáne Nura aýdandaryna jumys sapary barysynda aýyl sharýashylyǵy salasynyń ókilderimen kezdesip, egin jinaý naýqany qalai júrip jatqanyn, kúrdeli epidemiologiialyq jaǵdaiǵa bailanysty qandai kómek qajet ekenin talqylady.
Ónim jinaý maýsymynda oblystyń 33 iri sharýashylyǵy rezervtik qorǵa 36 myń tonna astyq jóneltedi, bul ótken jylǵy kórsetkishten 6 myń tonnaǵa artyq. Ol óz kezeginde kóktemde nan baǵasyn ustap turýǵa múmkindik beredi. Turaqtandyrý qory dástúr boiynsha jergilikti óndirýshilerdiń kókónisterine toly bolady. Oblys fermerleri qoimaǵa 2,5 myń tonna kartop, 400 tonna sábiz, 200 tonna qyryqqabat jóneltedi. Olar óz ónimderimen tek oblysty ǵana qamtyp qoimai, Almaty, Shymkent jáne Túrkistan oblystaryna da jóneltedi.
«Biyl mineraldy tyńaitqyshtarǵa 760 mln teńge sýbsidiia bólindi. Bul ótken jylǵy kórsetkishten 2 ese kóp. Nátijesinde mineraldy tyńaitqyshtar kólemi 147 myń gektarǵa artqanyn kórip otyrmyz. Jergilikti bilikten taǵy qandai kómek qajet, qandai problemalar bar?» – dep surady Jeńis Qasymbek agrarshylarmen kezdesý barysynda.
Aýyl turǵyndary qazir bir kúndi de bos jibermei jatqanyn aitty. Egis alqaptarynda jumys belsendi júrip jatyr. Karantin rejimine qaramastan, aitarlyqtai problemalar joq. Agrariiler aýyl sharýashylyǵy tehnikasyn jańartýda, keibireýler egis alańyn ulǵaitýǵa tyrysýda, al jańbyr egindi búldirmeýi úshin búgingi tańda kóptegen adamdar zamanaýi keptirý keshenderin iske qosty. Olar óńirimizdegi aýa-raiy qubylmaly bolǵandyqtan, bul qurylǵylar qajet deidi.
Mysaly, Osakarov aýdanynda «Jańa Ai» JShS basshysy Viacheslav Shamordin 5 myń tonna saqtaýǵa arnalǵan zamanaýi keptirý keshenin tanystyrdy.
«Gazgolderler, bý shyǵarǵyshtar ornatyldy. Iske qosý jumystaryn júzege asyryp jatyrmyz. Barlyǵy avtomattandyrylǵan. Bir jolǵy saqtaý 5 myń tonnany quraidy. Saǵatyna 100 tonna astyq qabyldap, keptire alamyz. Bul qondyrǵyǵa 300 mln teńgeden astam qarajat jumsaldy, biraq biz búgin bul keshenniń bizdi shyǵyndarymyzdyń ornyn jabatynyn bilemiz», - dedi Viacheslav Shamordin.
Egin jinaýǵa barlyǵy 2 345 astyq jinaityn jáne 60 kartop jinaityn kombain jumyldyryldy. Aýyl sharýashylyǵy kásiporyndary arzandatylǵan dizel otynymen qamtamasyz etilgen.
