© Sputnik / Evgenii Odinokov
Temirtaý qalasyna jaqyn jerde iri jol apaty boldy, dep habarlady Sputnik Qazaqstan agenttigi E-Karaganda portalyna silteme jasap.
Resmi málimetke sáikes, jol apaty 13 aqpan kúni shamamen saǵat 13:36-da bolǵan. DAF markaly júk kóliginiń júrgizýshisi Qaraǵandyǵa qarai bara jatqanda rólge ie bola almai, tasjolda turǵan kólikterdi soqqan. Saldarynan alty birdei avto – Toyota Camry, Volkswagen Vento, Renault Duster, Renault Logan, Volkswagen Polo men Volvo júk kóligi bir-birimen soqtyǵysqan. Zardap shekken adamdar týraly málimet joq.
Aita keteri, Qaraǵandy oblysynyń basym bóliginde boran basylmai tur. Osyǵan bailanysty tótenshe jaǵdai qyzmeti alys jolǵa shyqpaýǵa keńes berdi.
Keshe, 13 aqpanda aýa raiynyń qolaisyzdyǵyna bailanysty barlyq baǵytta tasjoldar jabylǵan bolatyn. Sol kezde 44 jol apaty tirkeldi. Qazirgi tańda joldar ashyldy.
