Qaraǵandy oblysynyń 40-tan astam nysandary Qazaqstannyń kieli jerleri kartasyna enýi múmkin. Bul týraly oblystyq Mádeniet, muraǵattar jáne qujattamalar basqarmasynyń jetekshisi Erkebulan Aǵymbaev málim etti, dep jazady QazAqparat.
«Búgingi tańda tizim anyqtaldy, onyń ishinde bizdiń oblysymyzdyń 40-tan astam jeri bar, - dedi ol. - Atalmysh tizim ortalyqqa jiberildi. Osy jazda, meniń bilýimshe, Astanadan komissiia keledi, ol barlyq atalǵan jerlerdi aralap shyǵady, sonan soń olardyń qaisysyn kartaǵa engizý kerektigin sheshetin bolady», - deidi Erkebulan Aǵymbaev.
Oblys ákiminiń baspasóz qyzmetiniń habarlaýynsha, qazir komissiia músheleri belgili-bir geografiialyq nysannyń qanshalyqty mańyzdy ekenin anyqtaityn algoritm qurastyryp jatyr.
Qaraǵandy oblysyndaǵy qasietti jerlerdiń tizimine Joshy han jáne Dombaýyl keseneleri jáne Áýlie taý engeni belgili. Joshy han kesenesi Qaraǵandy oblysynyń Ulytaý aýdanynda, Jezqazǵan qalasynan soltústik-shyǵysqa qarai 50 shaqyrym qashyqtyqta ornalasqan XIII-shi ǵasyr sáýlet eskertkishi. Ańyzdarǵa sai kesenede Shyńǵys hannyń úlken uly jerlengen. 1982-shi jyldan bastap eskertkish memleket qorǵaýyna alynǵan.
Dombaýyl kesenesi, kóptegen ǵalymdardyń pikirinshe, Ortalyq Qazaqstanda ornalasqan eń kóne eskertkishterdiń biri bolyp esepteledi. Dombaýyl kesenesi islamǵa deiingi kezeńge jatady. Ol kiiz úi pishindes salynǵan, jánede ortaaziialyq sáýlet eskertkishterinen anaǵurlym erekshelenedi. Kesene tas taqtalardan salynǵan. Áýlie taý - Saryarqa kóne taý silemderiniń Ulytaýdaǵy eń biik núktesi (1131 m).
Osyǵan deiin Qazaqstan prezidenti «Qazaqstannyń qasietti rýhani qundylyqtary» jáne «Qazaqstannyń kieli jerleriniń geografiiasy» atty jobalardy iske asyrýdy tapsyrǵan bolatyn. «Ideianyń túpki tórkini Ulytaý tórindegi jádigerler keshenin, Qoja Ahmet Iasaýi mavzoleiin, Tarazdyń ejelgi eskertkishterin, Beket ata kesenesin, Altaidaǵy kóne qorymdar men Jetisýdyń kieli mekenderin jáne basqa da jerlerdi ózara sabaqtastyra otyryp, ult jadynda birtutas keshen retinde ornyqtyrýdy meńzeidi», - dep Prezident óziniń ult sanasyn rýhani jańǵyrtý týraly maqalasynda jazǵan bolatyn.
Eske sala ketsek, QR Mádeniet jáne sport ministrliginiń indýstriia komiteti Qazaqstannyń kieli jerleriniń kartasyn qurý boiynsha jumystardy bastady.
