Qaraǵandy oblysynda koronavirýs infektsiiasynyń taralýyna jol bermeý úshin karantindik sharalardy kúsheitý týraly sheshim qabyldandy. Bul týraly Saryarqa telearnasynda tikelei efirde ótken brifingte Taýarlar men kórsetiletin qyzmetterdiń sapasy men qaýipsizdigin baqylaý komiteti departamenti basshysynyń m.a. Iýrii Zalygin málim etti, dep habarlaidy "Ult aqparat".
Atap aitqanda, 19 qazannan bastap oblystyń perimetri boiynsha 8 sanitarlyq beket ornatylady. Onda politsiia qyzmetkerleri men dárigerler kezekshilik etedi.
Málim etilgendei, kórshi oblystarda syrqattanýshylyqtyń ósýine bailanysty aldyn alý sharasy retinde 19 qazan kúni saǵat 00.00-den bastap óńirde sanitarlyq beketter ornatý týraly sheshim qabyldandy. Oblys boiynsha segiz beket bolady: Jezqazǵan, Ulytaý, Nura, Osakarov, Buqar jyraý, Qarqaraly aýdandarynda jáne Priozersk qalasynda.
Júrgizýshiler men jolaýshylardyń densaýlyq jaǵdaiyn dárigerler politsiia qyzmetkerlerimen birge tekseredi. Baqylaý termometriia men saýalnamany qamtidy.
Kireberisterde, liftiler men parkingterde táýligine keminde eki ret profilaktikalyq dezinfektsiialaý jáne ylǵaldy tazalyq jumystary júrgiziledi.
Kún saiyn balalar men aýla alańdary dezinfektsiialanady.
65 jastan asqan adamdarǵa qozǵalysty shekteý usynylady.
Memlekettik kásiporyndar men uiymdarda qyzmetshilerdiń 50% qashyqtan jumys formatyna kóshiriledi (shtatynda 30-dan astam qyzmetkeri bar).
Shetelge shyǵatyn týristermen aqparattyq jumysty kúsheitý talap etiledi.
«Ereje buzýshylyqtardy naqty ýaqyt rejiminde tirkeý úshin saýda,oiyn-saýyq ortalyqtarynda, saýda úilerinde, jelilik dúkenderde, qoǵamdyq tamaqtaný pýnkterinde (50-den astam otyratyn oryn bar) beinekameralar ornatý usynyldy.
Ónerkásiptik kásiporyndarda, avtovokzaldar men avtobeketterde statsionarlyq teplovizorlar men aqyldy beinebaqylaý júielerin ornatý talap etiledi.
Jolaýshylar kóligine júktemeni tómendetý maqsatynda kásiporyndar men uiymdardyń saralanǵan jumys kestesi boiynsha másele sheshiletin bolady.
Ónerkásiptik kásiporyndardyń basshylary óz qyzmetkerlerin jumysqa jáne úige jetkizýdi uiymdastyrýy kerek», - dedi spiker.
Sondai-aq atap ótilgendei, o blysta eriktiler zeinetkerler men múmkindigi shekteýli jandarǵa kómek kórsetý jumystaryn qaita jandandyratyn bolady.
Betperdelik rejimniń, sanitariialyq-dezinfektsiialyq talaptardyń saqtalýyn baqylaý kúsheitiledi.
Oiyn-saýyq, sporttyq, otbasylyq, estelik, saltanatty jáne basqa da buqaralyq is-sharalardy (banketter, úilený toilary, mereitoilar, eske alý), onyń ishinde úide ótkizýge tyiym salynady.
Oiyn-saýyq mekemeleriniń (karaoke, biliard, kompiýterlik klýbtar, túngi klýbtar, boýling ortalyqtary, jabyq úi-jailardaǵy balalar oiyn alańdary men attraktsiondary, batýttar jáne t.b.), kinoteatrlardyń (ashyq kinoteatrlardan basqa), býkmekerlik keńselerdiń jumysyna áli de ruqsat etilmeidi.
Karantin kezinde mobildi toptar 17 myńnan astam nysandy qamti otyryp, 3440 reid júrgizdi. 970-ten astam buzýshylyq anyqtaldy. Tártip buzýshylarǵa qatysty 101 mln teńgeden astam somaǵa aiyppul salyndy.
Iýrii Zalygin turǵyndardy karantindik talaptardy saqtaýǵa shaqyrdy: « Virýs áli de qaýipti. Úiden qajet bolmaǵan jaǵdaida shyqpańyzdar, kópshilik jinalatyn jerden aýlaq bolyńyzdar, áleýmettik qashyqtyq pen maska rejimin saqtańyzdar» , - dedi ol.
