Densaýlyq saqtaý ministrligi 6 sáýirde tústen keiin Qaraǵandy oblysynda 16 adamnan koronavirýs tabylǵanyn habarlaǵan bolatyn. Olardyń barlyǵy virýstan kóz jumǵan er adam jáne onyń otbasy múshelerimen bailanysta bolǵan.
Bul týraly Qaraǵandy oblystyq qoǵamdyq densaýlyq saqtaý basqarmasy habarlady. Naýqastar palatalarda oqshaý emdelip jatyr.
Qaraǵandy oblysynda jalpy 48 adamnan koronavirýs tabylǵan.
"Úsh adam reanimatsiiada, jaǵdaiy aýyr. Olardyń biri apparatpen tynys alyp jatyr. Taǵy úsh naýqastyń jaǵdaiy ortasha aýyr" delingen Qaraǵandy oblystyq qoǵamdyq densaýlyq saqtaý basqarmasynyń habarlamasynda.
Qazir virýs juqtyrǵandardy anyqtaý boiynsha epidemiologiialyq zertteý jalǵasyp jatyr.
Oblysta 1346 adam - úi karantininde. 862 adam 24 saǵat dárigerler baqylaýynda, 48-i infektsiialyq statsionarda jatyr.
1 naýryzda Temirtaý qalasynda jumys istegen Qaraǵandy qalasynda turǵan 62 jastaǵy er adam qaitys bolǵan. Buǵan deiin jergilikti dárigerler marqumnyń keminde bes týysynan koronavirýs tabylǵanyn habarlaǵan bolatyn.
Naýryz aiynyń sońynda Qaraǵandy oblysynda Qaraǵandy qalasy, Abai, Saran, Shahtinsk, Temirtaý qalalary karantinge jabyldy. Blokbeketterde arnaiy jasaq, sanitarlyq qyzmet ókilderi, áskeriler júr.
Qazaqstanda koronavirýs juqtyrǵandar sany 604 adamǵa jetti. Virýstan 6 adam qaitys bolǵan. 45 adam aiyqqan.
