دەنساۋلىق ساقتاۋ مينيسترلٸگٸ 6 سەۋٸردە تٷستەن كەيٸن قاراعاندى وبلىسىندا 16 ادامنان كوروناۆيرۋس تابىلعانىن حابارلاعان بولاتىن. ولاردىڭ بارلىعى ۆيرۋستان كٶز جۇمعان ەر ادام جەنە ونىڭ وتباسى مٷشەلەرٸمەن بايلانىستا بولعان.
بۇل تۋرالى قاراعاندى وبلىستىق قوعامدىق دەنساۋلىق ساقتاۋ باسقارماسى حابارلادى. ناۋقاستار پالاتالاردا وقشاۋ ەمدەلٸپ جاتىر.
قاراعاندى وبلىسىندا جالپى 48 ادامنان كوروناۆيرۋس تابىلعان.
"ٷش ادام رەانيماتسييادا, جاعدايى اۋىر. ولاردىڭ بٸرٸ اپپاراتپەن تىنىس الىپ جاتىر. تاعى ٷش ناۋقاستىڭ جاعدايى ورتاشا اۋىر" دەلٸنگەن قاراعاندى وبلىستىق قوعامدىق دەنساۋلىق ساقتاۋ باسقارماسىنىڭ حابارلاماسىندا.
قازٸر ۆيرۋس جۇقتىرعانداردى انىقتاۋ بويىنشا ەپيدەميولوگييالىق زەرتتەۋ جالعاسىپ جاتىر.
وبلىستا 1346 ادام - ٷي كارانتينٸندە. 862 ادام 24 ساعات دەرٸگەرلەر باقىلاۋىندا, 48-ٸ ينفەكتسييالىق ستاتسيوناردا جاتىر.
1 ناۋرىزدا تەمٸرتاۋ قالاسىندا جۇمىس ٸستەگەن قاراعاندى قالاسىندا تۇرعان 62 جاستاعى ەر ادام قايتىس بولعان. بۇعان دەيٸن جەرگٸلٸكتٸ دەرٸگەرلەر مارقۇمنىڭ كەمٸندە بەس تۋىسىنان كوروناۆيرۋس تابىلعانىن حابارلاعان بولاتىن.
ناۋرىز ايىنىڭ سوڭىندا قاراعاندى وبلىسىندا قاراعاندى قالاسى, اباي, ساران, شاحتينسك, تەمٸرتاۋ قالالارى كارانتينگە جابىلدى. بلوكبەكەتتەردە ارنايى جاساق, سانيتارلىق قىزمەت ٶكٸلدەرٸ, ەسكەريلەر جٷر.
قازاقستاندا كوروناۆيرۋس جۇقتىرعاندار سانى 604 ادامعا جەتتٸ. ۆيرۋستان 6 ادام قايتىس بولعان. 45 ادام ايىققان.
