Qaraǵandy haiýanattar baǵynyń basshylyǵy áleýmettik jeli qoldanýshylarynyń narazylyǵyn týdyrǵan jaǵdaidy túsindirdi. Tanymal pablikterdiń jazylýshylary videoda múiizderi kesilip, qanǵa oranyp jatqan buǵylardy kórip, ashýly pikirlerin jazǵan. Búgin haiýanattar baǵynyń basshylary bul máselege qatysty túsinikteme berdi, dep habarlaidy QazAqparat.
Keshe, 9 qyrkúiekte Qaraǵandynyń tanymal pablikteriniń paraqshalarynda fotosýretter men videolar paida boldy.
Onda múiizi kesilgen, basynan qany aǵyp jatqan buǵylardy kórýge bolady.
Bul video qaraǵandylyqtardyń narazylyǵyn týdyrdy. Alaida jel paidalanýshylaryn odan buryn janýarlardyń jaǵdaiy alańdatyp otyr.
Haiýanattar baǵynyń basshylyǵy túsindirgendei, janýarlardyń ómirine qaýip tónerdei eshqandai jait bolmaǵan – mundai protsedýra jyl saiyn ótkiziledi jáne onyń aldynda janýarlarǵa arnaiy qaýipsiz preparat egilip, qozǵalysy shekteledi.
«Men haiýanattar baǵynda shamamen 12 jyldan beri jumys istep kelem jáne biz árqashan janýarlardyń múiizin birdei ádispen kesip tastaimyz. Buǵy – óte jabaiy ańdar. Jyl saiyn biz erkek buǵylardyń múiizin kesemiz, óitkeni olar agressivti bolady. Qazir ańdarda tabiǵi juptasý kezeńi bastaldy, olardy bir-birinen qorǵaý jáne haiýanattar baǵynyń qyzmetkerleriniń qaýipsizdigi úshin múiiz kesý sharalary júrip jatyr. Keshe olar protsedýradan keiin birden videoǵa túsirildi, janýar qalpyna kelýi úshin shamamen 2 saǵat ýaqyt qajet. Bul jaǵdaida múiizder dereý arnaiy eritindimen óńdeldi. Olardy oraýǵa bolmaidy, odan paida joq. Olar múiizderin únemi uryp-soǵyp, dýalǵa qajap, kez kelgen tańǵyshty alyp tastaidy. Tabiǵatta buǵy kóktemde múiizderin tastaidy, biraq oǵan deiin olar únemi urǵashy buǵy úshin kúresedi. Olar tipti bir-birin óltirýge deiin barady. Urysta jeńilgen buǵy ketýi kerek. Biraq olar haiýanattar baǵynda, baratyn jeri joq. Sondyqtan janýarlar arasyndaǵy qaqtyǵys qaitalana beredi. Buǵan jol bermes úshin biz múiizderdi erterek alyp tastaimyz. Búgin sizder janýarlardyń jaǵdaiy jaqsy ekenin kórip otyrsyzdar. Olar júgirip, oinap júr. Bul - mindetti veterinarlyq shara, ony barlyq haiýanattar baǵynda ótkizedi», - dep túsindirdi haiýanattar baǵynyń qyzmetkeri Amin Alin.
Haiýanattar baǵynyń direktory Gúlnar Adambekova da kelýshiler haiýanattar baǵyna qatysty nege teris pikir aitatynyn túsinbeimin deidi.
Onyń aitýynsha, sońǵy jyldary haiýanattar baǵy aitarlyqtai ózgerip, janýarlardyń jaǵdaiy jaqsardy.
Onyń aitýynsha, búginde haiýanattar baǵynda 10 jyldan 30 jylǵa deiingi eńbek ótili bar qyzmetkerler jumys isteidi.
Olardyń barlyǵy keremet mamandar jáne olardyń eshqaisysy janýarlarǵa jamandyq tilemeidi, kerisinshe, olar ańdardyń ómir súrý jaǵdaiyn jaqsartýǵa tyrysady.
«Biz janýarlardyń ómirin jaqsartýǵa tyrysamyz. Bizdiń turaqty qonaqtarymyz saiabaqtyń qalai ózgergeni, qanshalyqty jaily bolǵandyǵy týraly birneshe ret aityp ketti. Bizdiń qyzmetkerler bul janýarlardy jaqsy kóredi jáne olarǵa ziian tigizgisi kelmeidi. Jańa jaǵdailardyń arqasynda biyl bizde birneshe jyldan keiin alǵash ret bizon tóldedi. Bul - haiýanattar baǵy úshin keremet oqiǵa», - deidi Gúlnar Adambekova.
