Keńes Odaǵynyń Batyry Nurken Ábdirov atyndaǵy Qaraǵandy aviatsiialyq bazasyna «Sý-30SM» ushaqtary jetkizildi.
Ushaqtar Reseiden tikelei reispen keldi, olardy Irkýtsk aviatsiialyq zaýytynyń tájiribeli synaq ushqyshtary jetkizdi, dep habarlaidy "Ult aqparat".
Jaýyngerlik tehnikany tapsyrý saltanatty jaǵdaida ótti. Saltanatty sharaǵa QR Qorǵanys ministri general-leitenant Nurlan Ermekbaev, QR QK Áýe qorǵanysy kúshteriniń Bas qolbasshysy aviatsiia general-leitenanty Nurlan Ormanbetov, Qaraǵandy oblysynyń ákimi Jeńis Qasymbek qatysty.
«Jańa aviatsiialyq tehnika Qazaqstan Qarýly Kúshterin qaita jaraqtandyrý josparyna sáikes Áskeri-áýe kúshterine kelip túsedi. «Sý-30SM-niń» óte manevrli kóp maqsatty joiǵyshtary áýe shabýylynan, áýe jáne jerdegi nysandardy anyqtaý men joiý quraldarynan áskerler men nysandardy qorǵaý múmkindigin edáýir arttyrady. Olardyń arqasynda Qarýly Kúshterdiń jaýyngerlik áleýeti artady», - dep atap ótti Nurlan Ermekbaev.
«Sý-30SM» 4++ jańa býyndy joiǵysh. Ol kúndiz-túni, kez-kelgen aýa-raiynda áreket ete alady. Jaýdyń ushaqtaryn atyp, jerdegi nysandardy joiyp qana qoimai, áýe barlaýyn júrgizip, basqa ushaqtarǵa maqsat qoia alady. Ol uzaq qashyqtyqqa jáne aýada janarmai quiý múmkindigine ie.
Qazaqstannyń «Irkýt» aviatsiialyq zaýytymen yntymaqtastyǵy bes jyl buryn bastaldy.
Reseilik synaq ushqyshy Maksim Koliýshinniń aitýynsha, «Sý-30SM» álemdegi eń tiimdi áskeri ushqyshtardyń biri.
«Men bul ushaqpen 2012 jyldan beri ushyp júrmin. Bizde qazaqstandyq ushqyshtarmen erteden qalyptasqan dostyǵymyz bar. Kimge senetinimizdi bilemiz», - deidi ol.
Qaraǵandy aviatsiialyq bazasynyń ushý jáne injenerlik-tehnikalyq quramy Taldyqorǵanda jáne osy ushaqty daiyndaýshy zaýytta tolyq qaita oqytýdan ótti. Osy tiptegi ushaqtardy ushýǵa, paidalanýǵa jáne olarǵa qyzmet kórsetýge tiisti ruqsattar alyndy.
«Qaita oqytý eki kezeńde ótti - teoriia jáne tájiribe. Men osy klastaǵy ushaqpen ushatynyma qýanyshtymyn. Men alǵash ret 2015 jyldyń 27 tamyzynda ushtym. Sodan keiin kýrsant boldym. Sol kúnnen bastap ómirimdi aviatsiiaǵa arnaýdy uiǵardym», - dedi jas ushqysh Temirlan Báimenov.
Jeńis Qasymbek áskeri qyzmetkerlerdi búgingi mańyzdy oqiǵamen quttyqtady.
«Keńes Odaǵynyń Batyry Nurken Ábdirovtyń esimimen atalatyn Aviabaza - Qaraǵandynyń maqtanyshy. Sizder qoiylǵan mindetterdi laiyqty atqaratyndaryńyzǵa senimdimin. Jańa jyl qarsańynda qyzmette tabys, jaqyndaryńyzǵa, otbasylaryńyzǵa densaýlyq, amandyq jáne ashyq aspan tileimin», - dedi óńir basshysy.
