Elimizde qara metallýrgiia salasyndaǵy óndiris 2 jyl qatarynan teris mán kórsetip otyr. Bolat óndirý 18 paiyzǵa qysqarǵan. Basty úsh óńirdegi óndirýshiler arasynda Qaraǵandy oblysynyń metallýrgiiasy ǵana oń nátije kórsetýde, dep habarlaidy energyprom.kz.
2020 jyldyń qańtar-tamyzynda qara metallýriia salasyndaǵy óndiris aqshaǵa shaqqanda 1,1 trln teńgeni qurap, ótken jyldyń dál osyndai kezeńimen salystyrǵanda 6,2 paiyzǵa kemidi. Ónim kólemi 2 jyl qatarynan tómendeýde. Ótken jyldyń 8 aiynda óndiris kólemi 6,8 paiyzǵa qysqarǵan bolatyn. Degenmen, 2019 jyldyń qańtar-jeltoqsanynda ónerkásip óndirisiniń indeksi 101,3 paiyz boldy.
Qazaqstanda qara metallýrgiia salasyndaǵy óndiris negizgi úsh óńirde shoǵyrlanǵan: bolat óndiretin ArcelorMittal kompaniiasy ornalasqan Qaraǵandy oblysy (442,3 mlrd teńge, aqshaǵa shaqqanda jyl ishinde 8,5 paiyz ósim bar); KSP Steel jáne Aqsý ferroqorytpa zaýyty bar Pavlodar oblysy (286,6 mlrd teńge,18,7 paiyz teris mánge ie) jáne Aqtóbe ferroqorytpa zaýyty jumys isteitin Aqtóbe oblysy (202,6 mlrd teńge, 14,6 paiyz teris mánge ie).
Sektorda naqty mánde bolat jabyndysy bar tabaqtardan sedvich-panelder óndirisi 31,4 paiyzǵa artyp, 10,6 myń tonnany qurady. Jazyq ilek óndirisi de 11,1 paiyz ulǵaiyp, 1,7 mln tonnaǵa jetti. Al tazartylmaǵan bolat óndirisi 17,5 paiyzǵa, 2,5 mln tonnaǵa qysqardy. Degenmen, qospa bolat óndirisi 28,7 paiyzǵa kóbeiip, 3,9 myń tonna boldy.
