Qapshaǵaida jalǵan politsei ustaldy. Ol ishki ister organdarynda jumys isteimin dep ózgeniń 737 myń teńge aqshasyn iemdengen.
Almaty oblystyq politsiia departamenti baspasóz qyzmetiniń málimetinshe, Qapshaǵai qalasynyń politsiiasyna 21 jastaǵy turǵynnan aryz túsken. Ol ózin politseimin dep tanystyrǵan er adamnyń senimine kirip, aqsha alǵanyn jetkizgen. Biraq qarajatty qaitarmaǵandyqtan, ol politsiiaǵa aryzdanǵan.
Jedel izdestirý kezinde 23 jastaǵy kúdikti ustaldy. Qazir onyń ústinen QR Qylmystyq kodeksiniń 190-baby, 1-bóligi, iaǵni, «Alaiaqtyq» boiynsha qylmystyq is qozǵalyp, tergeý júrip jatyr.
«Tártip saqshylary onyń ne sebepti ózin politseimin dep tanystyryp, qandai maqsatpen aqsha alǵanyn, sonymen qatar, ózge qylmystarǵa qatysy bar-joǵyn anyqtap jatyr», - delingen Almaty oblystyq politsiia departamentiniń habarlamasynda.
Departament ustalǵan adamnyń politsiia qyzmetkeri emes ekenin jáne onyń bul jumysqa múldem qatysy joq ekenin málimdedi. «Tergeý barysynda anyqtalǵandai kúdikti jábirlenýshiniń senimine kirip, 737 myń teńge aqshasyn iemdengeni anyqtaldy. Jábirlenýshi der kezinde politsiiaǵa shaǵymdanǵandyqtan kúdikti de der kezinde ustaldy», - dep tolyqtyrdy politsiianyń baspasóz qyzmeti.
