Almaty oblysynyń qutqarýshylary Qapshaǵai sý qoimasynda alty adamdy qutqardy, dep habarlaidy "Ult aqparat".
Qutqarýshylardyń habarlaýynsha, 15 tamyzda túngi saǵat 02:05-te Almaty oblystyq TJD-ǵa Qapshaǵai sý qoimasynyń ońtústik-batys jaǵalaýynda motorly qaiyqta alty adamnyń qalyp qoiǵany týraly habarlama kelip túsken.
«Qutqarýshylar dereý oqiǵa ornyna shyqty. Anyqtalǵandai, demalyp júrgen alty adam 9-oryndyq plastik motorly qaiyqpen júzip shyqqan. Alaida, olardyń qaiyǵy sý qoimasynyń ortasynda isten shyǵyp ketken.
Qaiyqtaǵy adamdardyń qutqarý keýdeshesi bolmaǵan. 32 jastaǵy úsh er adam men úsh áiel (ekeýi – 1999 jylǵy, bireýi – 2000 jylǵy) qutqarylyp, jaǵaǵa jetkizildi. Olarǵa meditsinalyq kómek qajet bolǵan joq», - delingen habarlamada.
