Úkimet otyrysynda QR Ulttyq ekonomika ministri Álibek Qýantyrov Qapshaǵai qalasyn qaita ataý máselesi pysyqtalyp jatqanyn málim etti, dep habarlaidy QazAqparat.
«Memleket basshysy «Jańa Qazaqstan: Jańarý men jańǵyrý joly» atty Qazaqstan halqyna joldaýy sheńberinde eldiń saiasi júiesi men ákimshilik-aýmaqtyq qurylymyn ózgertý boiynsha naqty mindetter qoidy.
Bul memlekettik qurylystyń jańa kezeńiniń bastalýyn bildiredi.
Memleket basshysy usynǵan bastamalar elimizde jańa saiasi mádenietti qalyptastyrýǵa baǵyttalǵan reformalardyń muqiiat zerdelengen baǵdarlamasy bolyp tabylady.
Atap aitqanda, elimizdiń Konstitýtsiiasyna 30-dan astam ózgerister men tolyqtyrýlar engiziledi, sondai-aq jyl sońyna deiin 20-dan astam zań qabyldanady», - degen ministr Joldaýdy iske asyrý jónindegi jalpyulttyq is-sharalar josparynyń jobasy ázirlengenin atap ótti.
Aitýynsha, Memleket basshysynyń tapsyrmalaryn iske asyrý maqsatynda Ulttyq ekonomika ministrligi negizgi 3 baǵyt boiynsha jumys júrgizedi. Olar:
1. Eldiń ákimshilik-aýmaqtyq qurylymyn jetildirý;
2. Jergilikti ózin-ózi basqarýdy ortalyqsyzdandyrý;
3. Daǵdarysqa qarsy kezek kúttirmeitin sharalar.
«Abai, Jetisý jáne Ulytaý oblystaryn qurý kózdelýde jáne halyqtyń pikirin eskere otyryp, Qapshaǵai qalasyn qaita ataý máselesi pysyqtalýda», - dedi Álibek Qýantyrov.
