Foto: baq.kz
Túrkistan oblysyndaǵy «Qaplanbek» ótkizý beketi mańynda bolǵan janjal áleýmettik jelide keńinen tarady. Videoda er adamnyń ekinshisin buraýyshpen qorqytyp turǵan sáti beinelengen, dep habarlaidy Ult.kz.
Oqiǵa Saryaǵash aýdanynda tirkelgen. Jelidegi aqparatqa sáikes, janjal kezinde kórshi elden kelgen shetel azamattarynan aqsha talap etilip, bopsalaý áreketteri jasalǵan.
Osy jaitqa bailanysty Túrkistan oblystyq politsiia departamenti qylmystyq is qozǵalǵanyn habarlady.
Resmi málimetke sáikes, jedel-izdestirý sharalary barysynda 43 jastaǵy Túrkistan oblysynyń turǵyny ustalǵan. Ol jumyssyz jáne turaqty turǵylyqty jeri joq azamat retinde tirkelgen.
«Kúdikti Saryaǵash aýdandyq politsiia basqarmasynyń ýaqytsha ustaý izoliatoryna qamaldy», – delingen politsiia habarlamasynda.
Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan tergeý amaldary júrgizilýde.
Sondai-aq politsiia shekara mańyndaǵy qoǵamdyq tártip pen azamattardyń qaýipsizdigi turaqty baqylaýda ekenin aityp, turǵyndardy tek resmi aqparatqa senýge jáne jalǵan málimet taratpaýǵa shaqyrdy.
