Qańtar oqiǵasyna qatysty 585 kúdikti qamaýda otyr. Bul týraly Ortalyq kommýnikatsiialar qyzmetinde QR Bas prokýratýrasy 1-qyzmet basshysynyń orynbasary Eldos Qilymjanov aitty, dep habarlaidy QazAqparat.
«Qańtar oqiǵasy boiynsha jalpy 265 qylmystyq is sotqa joldanyp, 243 adam sottaldy. Qazirgi ýaqytta 585 kúdikti qamaýda otyr. Atalǵan adamdar qiratý, ǵimarattardy órteý, qarý jymqyrý, memlekettik jáne quqyq qorǵaý organdary ǵimarattaryna qarýly shabýyl jáne basqa qylmystarǵa belsendi túrde qatysqan. Árbir qamalǵan kúdikti boiynsha olardyń osy qylmystarǵa qatysy bar ekenin dáleldeitin jetkilikti málimet bar. Buǵan deiin biz Almaty qalasy áýejaiyna shabýyl jasalǵanyn habarlaǵan bolatynbyz, munda keibir qylmyskerlerdiń rólin túsindirgim keledi», - dedi Qilymjanov.
Osy oraida ol 5 qańtarda N. esimdi azamat bir top adammen birge Almaty qalasy áýejaiynyń ushý-qoný jolaǵynyń jaryǵyn óshirgenin aitty.
«Osy rette N. óziniń áreketterimen strategiialyq obektiniń qyzmetin toqtatty, saldarynan jolaýshylar mingen ushaqtar ushyp kete almady jáne toqtan ajyratylǵan ushý-qoný jolaǵynda 10 saǵattan artyq turýǵa májbúr boldy. Osy ýaqytta qarýly top Almaty áýejaiynyń ǵimaratyn qiratyp, tonady. N-niń is-áreketteri terrorizm aktisi, iaǵni Qylmystyq kodekstiń 255-babymen saralandy. Onyń qylmystarǵa qatysy bary jinalǵan dáleldemelermen rastaldy», - dedi Bas prokýratýra ókili.
