Qańtarda Qazaqstannyń ulttyq qor aktivteri 1 mlrd dollarǵa kemidi. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Ulttyq qordyń aktivteri osy jyldyń basynan bastap 1 mlrd AQSh dollaryna tómendep, qańtardyń sońynda 57,7 mlrd AQSh dollaryn qurady. Onyń sebepteri: ulttyq qorǵa túsimder 43 mlrd teńge, onyń ishinde valiýtalyq túsimder 56,2 mln AQSh dollary nemese teńge balamasynda 24 mlrd boldy; jyl basynan bastap 381 mlrd teńgege nysanaly jáne kepildendirilgen transfertter bólýdi qamtamasyz etý úshin 720 mln dollar satyldy; investorlardyń táýekelge barý deńgeiiniń tómendeýine bailanysty biylǵy jylǵy qańtarda MSCI World aktsiialar indeksiniń tómendeýi -1 paiyz boldy», - dedi UB tóraǵasy.
Onyń aitýynsha, ulttyq qordyń atalǵan kezeńdegi investitsiialyq kirisi (-)340 mln AQSh dollaryn nemese -0,59 paiyzdy qurady boldy.
«Qańtarda qor naryqtaryndaǵy qubylmalylyq ekonomikanyń birkelki qalpyna kelmeýine, sondai-aq kásibi emes investorlardyń saýda platformalaryndaǵy belsendiligi aiasynda shyǵyny kóp kompaniialar aktsiialarynyń sharyqtaýyna bailanysty kúsheie tústi. Bul rette aqpannyń basynda aktsiialar naryǵynyń qalpyna kelýi baiqaldy. Biylǵy jylǵy aqpannyń alǵashqy 2 aptasynda Ulttyq qordyń investitsiialyq kirisi biylǵy jylǵy qańtardaǵy quldyraýdy ótep, 800 mln AQSh dollaryn qurady», - dedi Erbolat Dosaev.
