Qańtarda elimizde 7 mln tonna munai óndirildi. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Kórsetilgen kezeńde munai jáne kondensat óndirý kólemi 7 mln tonnaǵa jetip, qańtar aiy josparynyń 98,3 paiyzyn qurady. Sonyń ishinde munai-gaz salasyndaǵy iri kompaniialar boiynsha kórsetkishter tómendegidei: Teńiz jobasynda atalǵan kezeńde 2,05 mln tonna munai óndirildi. Bul esepti aidyń josparyna 95,8 paiyzdy quraidy»,- dedi ol.
Ministrdiń aitýynsha, jospardyń oryndalmaýyna qańtardaǵy qolaisyz meteorologiialyq jaǵdailar, atap aitqanda tuman, jańbyr, ylǵaldylyq, muzdaq sebebinen elektr jelilerindegi joǵary voltty kommýtatsiialyq qurylǵylarda «kerneý ushqyndaýy» sebep bolyp otyr. Joǵaryda atalǵan tehnologiialyq buzýshylyqtardyń saldarynan «Teńizshevroil» jáne «Atyraý munai óńdeý zaýyty» nysandarynda apattyq toqtaýlar oryn aldy. «2-býyn» qondyrǵysy (60 MVt) zaýyty jáne «shiki gazdy aidaý» zaýyty eki táýlikke toqtady.
«Osy tehnologiialyq buzýshylyqtarǵa sáikes, Energetika ministrligi atomdyq jáne energetikalyq qadaǵalaý men baqylaý komitetiniń basshylyǵymen birge múddeli taraptardy tarta otyryp, tergeý júrgizýde», - dedi Nurlan Noǵaev.
Onyń dereginshe, Soltústik Kaspii jobasy – Kashaǵanda munai óndirý kólemi 1,23 mln tonna bolyp, jospar 100 paiyz oryndaldy. Qarashyǵanaq jobasynyń kórsetkishi 1,1 mln tonnany qurap otyr. Jospar 101 paiyzǵa artyq.
«Esepti kezeńde 5,5 mln tonna munai eksporttaldy. Jospar 100 paiyz oryndaldy», - dedi ol.
