2023 jyldyń 14 qańtarynda elimizdiń 20 óńirinen bir-bir Senat depýtatyn sailaý ótedi. Bul týraly QR Ortalyq sailaý komissiiasynyń tóraǵasy Nurlan Ábdirov aitty, dep habarlaidy QazAqparat.
«Ózderińiz biletindei, QR Konstitýtsiiasynyń 44-babyna, «Sailaý týraly» Konstitýtsiialyq zańnyń 69-babyna sáikes, Parlament Senaty depýtattarynyń bir bóligi, iaǵni, ár óńirden bir-birden sailanatyn depýtattar ókilettiginiń konstitýtsiialyq merzimi 2023 jyly aiaqtalatyna bailanysty Memleket basshysynyń 26 qarashadaǵy №4 Jarlyǵymen QR Parlamenti Senaty depýtattarynyń kezekti sailaýy 2023 jylǵy 14 qańtarǵa taǵaiyndaldy. Osylaisha, elimizdiń Prezidenti atap ótkendei, Parlamenttiń joǵarǵy palatasy depýtattarynyń kezekti sailaýy konstitýtsiialyq reformany naqty júzege asyrýdyń jalǵasy bolmaq. Óz ókilettigine sai Ortalyq sailaý komissiiasy Senat depýtattarynyń sailaýyn uiymdastyrý men ótkizýge basshylyq etedi. Osyǵan orai 2023 jylǵy 14 qańtarǵa belgilengen Senat depýtattarynyń sailaýyn ázirleý men ótkizý jónindegi negizgi is-sharalardyń kúntizbelik josparynyń jobasy ázirlengen», - dep atap ótti búgin Nurlan Ábdirov OSK otyrysynda.
Osydan keiin atalǵan másele boiynsha baiandama jasaý úshin sóz OSK tóraǵasynyń orynbasary Konstantin Petrovke berildi.
Onyń atap ótýinshe, depýtattar sailaýyn Senat depýtattarynyń konstitýtsiialyq ókilettigi merziminiń bitýine deiin keminde tórt ai qalǵanda taǵaiyndalady jáne ol konstitýtsiialyq ókilettik merziminiń bitýinen keminde eki ai buryn ótkiziledi.
«Qazaqstan Respýblikasynyń azamaty jáne onyń aýmaǵynda sońǵy on jyl boiy turaqty turyp jatqan adam Parlament depýtaty bola alady. Jasy otyzǵa tolǵan, joǵary bilimi jáne keminde bes jyl jumys stajy bar, tiisti aýmaǵynda keminde úsh jyl turaqty turyp jatqan adam Senat depýtaty bola alady», - dedi ol.
