Qańtar oqiǵasynda urlanǵan qarýdyń kóp bóligi tabylmai jatyr. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Urlanǵan qarýdyń aýqymdy bóligi áli de zańsyz ainalymda. Barlyǵy – 2 113 birlik. Onyń ishinde – azamattyq qarýdyń 1300 birligi men 813 tabeldi qarý. Ishki ister organdary elimizde zańdylyqty jáne quqyq tártibin qamtamasyz etý boiynsha jumysty jalǵastyrýda», - dedi Sanjar Ádilov Ortalyq kommýnikatsiialar qyzmetindegi brifing barysynda.
Onyń atap ótýinshe, qańtar oqiǵasy kezinde zardap shekken azamattarǵa ótemaqy tóleýdi qamtamasyz etý úshin barlyq kúsh jumsalyp jatyr.
«Adal azamattardy qańtar oqiǵalaryna qatysty kez kelgen aqparatty ishki ister organdaryna habarlaýǵa, al qarýdy tapqan jaǵdaida ony erikti túrde tapsyrýǵa taǵy da shaqyramyz», - dedi ol.
