Qańtar oqiǵasyna qatysty tergeý barysynda qysym kórsetý faktisimen 15 qylmystyq is qozǵaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Sonymen qatar buryn qamaýǵa alynǵandardyń bultartpaý sharalaryn jeńildetip jatyrmyz. Mysaly, prokýrorlar Almaty qalasynda - 59, Qyzylorda oblysynda - 3 jáne Shyǵys Qazaqstanda - 1 adamdy qamaýdan bosatty. Olardan eshqaida ketpeý týraly qolhat alyndy. Sol siiaqty Qyzylorda prokýrorlarynyń talaby boiynsha sot sanktsiiasymen úsh adam úiqamaqqa jiberildi», - dedi ol ortalyq kommýnikatsiialar qyzmetidegi brifing barysynda.
Onyń aitýynsha, osy atqarylyp jatqan jumystardyń ashyqtyǵyn qamtamasyz etý úshin qoǵamdyq uiymdarmen tyǵyz bailanys ornatylǵan.
«Sondai-aq tergeýdegi zańsyz áreketter týraly shaǵymdardy erekshe baqylaýǵa alyp, tekserýdemiz. Búgingi tańda prokýratýraǵa 108 aryz tústi. Olardyń negizinde laýazymdyq ókilettikti asyra paidalaný, tergeý barysynda qysym kórsetý faktileri boiynsha 15 qylmystyq is qozǵaldy. Atap aitqanda, Atyraýdaǵy «Dinamo» stadionynda oryn alǵan jaǵdailar, Taldyqorǵan qalasynyń turǵyny Batyrbaevqa zańsyz kúsh qoldaný jáne basqa da faktiler bar. Osyndai oqiǵalardyń jan-jaqty tolyq tekserilýin qamtamsyz etý úshin olar boiynsha tergeý júrgizý jemqorlyqqa qarsy kúres qyzmetine jáne arnaýly prokýrorlarǵa tapsyryldy», - dedi Eldos Qilymjanov.
