QR Prezidenti Qasym-Jomart Toqaev qańtar oqiǵasyn tergeýge qatysty suraqqa jaýap berdi, dep habarlaidy QazAqparat.
«Almatyda memlekettik tóńkeriske, Memleket basshysyn laýazymynan yǵystyrýǵa talpynys boldy. Biz munyń tájiribeli kásibilerdiń jaqsy uiymdastyrǵan aktsiiasy bolǵanyn túsinemiz. Olar adamdardy ákimshilik ǵimarattarǵa bastap bardy. Sonymen qatar osy oqiǵalar kezinde 3 myńnan astam qarý urlandy. Olardyń basym bóligi áli kúnge deiin qolda júr. Biz tergeýdi úlken qiyndyqpen júrgizip jatyrmyz. Sebebi, osy oqiǵalardyń uiymdastyrýshylary men úilestirýshileri ózderin barynsha kásibi ustap, barlyǵyn áshkereleýge múmkindik beretin óte mańyzdy izderdi jasyra aldy», - dedi Memleket basshysy reseilik jýrnalist Andrei Kondrashovqa bergen suhbatynda.
Prezidenttiń atap ótýinshe, vedomstvoaralyq arnaýly top memlekettik tóńkeris jasaýǵa baǵyttalǵan osynaý talpynystyń barlyq mán-jaiyn ashý úshin tabandy túrde jumys istep jatyr.
«Almatyǵa óte qatygezdikpen shabýyl jasaldy. Adamdar óte qatty zorlyq-zombylyqqa ushyrady, dárigerler, qarapaiym adamdar. Úlken bazarlardan kelgen maroderler óte kóp boldy. Almaty ákimdigi men Prezident rezidentsiiasynyń órtengenin aityp ta otyrǵanym joq. Almatyda oryn alǵan oqiǵaǵa jeńil qaraýǵa bolmaidy», - dedi Toqaev.
Memleket basshysy tragediia aýqymynyń úlkendigin jáne qysqa merzimde barlyq mán-jaidy ashýdyń qiyndyǵyn basa aitty.
