Qańtar oqiǵasyna qatysty tergeý jumysy negizinen jappai tártipsizdik jáne terrorizm aktileri boiynsha júrgizilip jatyr. Bul týraly QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Qylmystyq qýdalaý organdarymen qańtar oqiǵasynyń barlyq sebebi men mán-jaiyn anyqtaý baǵytynda jumys jalǵasyp jatyr. Jumystyń negizgi kólemi jappai tártipsizdikter men terrorizm aktilerimen júrgizilýde. Ister boiynsha myńnan astam adam kúdikti dep tanyldy. Árqaisymen jaýap alý, bettestirý, oqiǵa ornyn naqtylaý jáne basqa keshendi tergeý áreketteri júrgiziledi», - dedi ol Ortalyq kommýnikatsiialar qyzmetindegi brifing barysynda.
Onyń aitýynsha, tek arnaiy prokýrorlardyń isteri boiynsha 30 myńnan astam tergeý áreketi júrgizilgen.
Saraptama uiymdarynyń óndirisinde úsh myńnan astam zertteý bar.
«Búkil jumys qylmysqa ár qatysýshysynyń rólin anyqtaý, onyń áreketterin obektivti baǵalaý jáne zańdy protsestik sheshim qabyldaý úshin jasalady. Tolyq, obektivti jáne jan-jaqty tergeý júrgizý úshin qylmystyq qýdalaý organdary búkil kúsh-jigerin jumsap jatyr», - dedi Bas prokýratýra ókili.
