Qańtar oqiǵasyna qatysty raqymshylyqqa bir ǵana quqyq qorǵaýshy iligedi. Bul týraly Bas prokýrordyń orynbasary Áset Shyndaliev málimedi, dep habarlaidy Sputnik Qazaqstan.
Resmi málimetke sáikes, qańtar oqiǵasynan keiin 1 600 adam jaýapqa tartylyp jatyr. Olardyń 49-y – quqyq qorǵaý qyzmetkeri.
"Barlyǵy qasaqana aýyr qylmys jasaǵany úshin aiyptalyp otyr. Sonyń ishinde azaptaý, bilikti asyra paidalaný jáne memleketke opasyzdyq jasaý áreketteri bar. Bul qylmystar raqymshylyqqa enbeidi", - dedi Shyndaliev senattyń jalpy otyrysynda.
Onyń aitýynsha, raqymshylyqqa bir ǵana quqyq qorǵaý qyzmetkeri iligip otyr.
"Ol qylmysty jasyrǵany úshin aiyptaldy. Bul qasaqana aýyr qylmys bolyp sanalady. Raqymshylyq boiynsha ol jazadan tolyǵymen bosatylmaidy. Jaza merzimi ǵana qysqarady", - dep atap ótti Shyndaliev.
Bas prokýratýra qańtar oqiǵasy kezinde quqyq qorǵaý qyzmetkerleri jasaǵan qylmystardy erekshe baqylaýda ustap otyr.
"Raqymshylyq aiasynda quqyq qorǵaýshylar bosap shyǵady deýge bolmaidy. Oǵan eshqandai kúmán bolmaýǵa tiis", - dedi bas prokýrordyń orynbasary.
