Qańtar oqiǵasy quqyq qorǵaý men memlekettik organdardyń arasynda úilesimdi árekettiń joqtyǵyn kórsetti. Bul týraly Májilis depýtaty Berik Bekjanov aitty, dep habarlaidy QazAqparat.
«Barshaǵa belgili, ádildiktiń basty ólshemi - adam quqyqtary teńdiginiń júzege asýy. Al ádildik pen zańdylyqtyń saqtalýy - qoǵam ómiri turaqtylyǵynyń alǵysharty. Qazaq qoǵamyn dúr silkindirgen qańtar oqiǵasy qoǵamǵa qajet qundylyqtardy qaita qaraýǵa májbúr etti. Qoldanystaǵy atazańymyzǵa sáikes, elimizdegi eń basty qundylyq – adamnyń ómiri men bostandyǵy. Memleket basshysy Qasym-Jomart Toqaev «damýdyń negizgi tetigi - zań men tártip» ekenin basa aitqan bolatyn. Jalpy, elimizde adam quqyǵy týraly sóz bolǵanda eldiń synyna jii ushyraityn másele - tergeý organdarynyń ustalǵan azamattarǵa zábir kórsetý oqiǵasy. Buryn da kúrmeýi sheshilmegen bul másele qańtar oqiǵasynan keiin odan ary ýshyǵyp, órshi tústi. Iá, kináliler jaýapqa tartylyp, jazasyn alar. Alaida, elge túsiniksiz jaǵdai qashanǵy quqyq qorǵaý organdarynyń keibir qyzmetkerleri tarapynan osy tektes zańsyz, ult bolmysyna kereǵar árekette jalǵasyn taba bermek? Ozbyrlyq áreketterge núkte qoiatyn zaman qashan týady? Osy turǵyda tergeý satysynda zorlyq-zombylyqtyń aldyn alý úshin quqyq qorǵaý organdary jańa kózqaraspen qandai jumys atqarýy tiis? Bul másele tóńireginde sózdiń emes, istiń nátijeli bolaryna úmit mol», - dedi depýtat Májilistiń jalpy otyrysynda.
Onyń atap ótýinshe, qasiretti qańtar oqiǵasy quqyq qorǵaý jáne memlekettik organdardyń arasynda úilesimdi árekettiń bolmaǵanyn ashyp berdi.
«Tipti, úilesimdi áreket kútken keibir kúshtik organdar «balapan basymen, turymtai tusymen» bolǵan halyqqa arasha bolýdyń ornyna óziniń qara shańyraǵyn qorǵaýǵa murshasy kelmedi. Bul rette prokýratýra organdary janynan qurylǵan zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úilestirý keńesteriniń jumysyn túbegeili ózgertip, olardyń ózara úilesimdi is-áreketin is júzinde damytýdy, qajet bolǵan jaǵdaida tiisti organdarǵa zań deńgeiinde ókilettik bere otyryp, jaýapkershilikti de qatar júkteý qajet», - dedi Berik Bekjanov.
