Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi Venaǵa jumys sapary barysynda Eýropadaǵy qaýipsizdik jáne yntymaqtastyq uiymynyń (EQYU) Turaqty keńesiniń otyrysynda Qazaqstanda qańtar aiynda bolǵan oqiǵalar týraly brifing ótkizdi, dep habarlaidy QazAqparat.
M.Tileýberdi EQYU-ǵa qatysýshy elderdiń ókilderin bolǵan oqiǵanyń sebepteri, terrorizmge qarsy operatsiianyń nátijeleri, UQShU bitimgershilik missiiasy týraly habardar etti. Qazirgi ýaqytta eldegi jaǵdai tolyǵymen turaqtanǵanyn jáne Qazaqstan óziniń kópvektorly saiasatyn jalǵastyryp, barlyq halyqaralyq mindettemelerin ustanatynyn erekshe atap ótti.
Ministr sondai-aq, QR Prezidenti Qasym-Jomart Toqaevtyń jańadan qurylǵan QR Úkimetiniń aldyna qoiǵan eldegi áleýmettik-ekonomikalyq jaǵdaidy jaqsartý jónindegi mindetteri, sondai-aq «Halyq únine qulaq asatyn memleket» tujyrymdamasy aiasynda júrgizilip jatqan saiasi reformalardyń jańa paketi týraly habardar etti.
Sapar aiasynda M.Tileýberdi EQYU basshylyǵymen - Bas hatshy Helga Shmid, Demokratiialyq institýttar jáne adam quqyqtary jónindegi biýronyń direktory Matteo Mekachchi, EQYU BAQ bostandyǵy jónindegi ókili Tereza Ribeiro, sondai-aq EQYU Parlamenttik Assambleiasynyń Tóraǵasy Margareta Sederfeltpen ekijaqty kezdesýler ótkizdi. Taraptar buǵan deiin qol jetkizilgen ýaǵdalastyqtardy iske asyrý barysyn talqylap, Memleket basshysynyń jańa reformalary aiasynda odan ári yntymaqtastyqtyń perspektivalaryn belgiledi.
QR SIM basshysy Aýstriianyń Eýropalyq jáne halyqaralyq ister jónindegi federaldyq ministri Aleksandr Shallenbergpen ekijaqty kezdesý ótkizdi. Olar ózara yntymaqtastyqty nyǵaitý boiynsha aldaǵy qadamdardy talqylady. Qazaqstan men Aýstriia arasyndaǵy diplomatiialyq qarym-qatynastardyń ornaǵanyna 30 jyl tolýyn eskere otyryp, biylǵy jyly ótetin is-sharalarǵa erekshe nazar aýdaryldy. Taraptar ekijaqty shart-quqyqtyq bazany keńeitý týraly ýaǵdalasty. Kelissózder qorytyndysy boiynsha ministrler aýstriialyq jáne sheteldik BAQ úshin birlesken baspasóz konferentsiiasyn ótkizdi. Oǵan qosa, M. Tileýberdi aýstriialyq jáne eýropalyq jýrnalister úshin jeke brifing ótkizdi.
