Qańtar oqiǵasy kezinde Shymkentte eshkim oq atýǵa ruqsat bergen joq. Bul týraly ortalyq kommýnikatsiialar qyzmetinde ótken brifingide qala ákimi Murat Áitenov aitty, dep habarlaidy QazAqparat.
«Shtabta oq atýǵa tapsyrma bolmaǵan da, bolmaidy da. Al, biraq búgingi kúni quqyq qorǵaý qyzmetkerleriniń ómirine qaýip tónip tursa, zańǵa sáikes óz qarýyn qoldanýǵa ruqsaty bar», - dedi Murat Dúisenbekuly.
Sondai-aq, qala ákimi qańtar oqiǵasyndaǵy videonyń ashyq túrde BAQ arqyly kórsetilgendigin jetkizdi.
«Qolyna temir tersek ustaǵan azamattar politsiiany uryp jatqany jaiynda videoda da bar. Biz ony ashyq túrde jergilikti BAQ-ta kórsettik. Shymkent qalasynda ustalǵan tártip buzýshylylarǵa túsindirý jumystary júrgizildi. Aiyby dáleldengenderge sot arqyly sheshim shyǵaryldy», - dedi ol.
Aita keteiik, keshe QR Bas prokýratýrasy 1-qyzmet bastyǵynyń orynbasary Eldos Qilymjanov Shymkent prokýrorlary 35 kúdiktiniń isin sotqa bergenin málimdegen bolatyn.
