Búgin, 11 shildede Almaty qalasynyń Almaly aýdandyq soty Qańtar oqiǵasy kezinde "qarý-jaraq urlady" degen kúdikke ilingen Álibek Imanbekovty alty jylǵa bas bostandyǵynan aiyrdy. Oǵan Qylmystyq kodekstiń "Qarýdy, oq-dárilerdi, jarylǵysh zattar men jarylys qurylǵylaryn jymqyrý ne qorqytyp alý" dep atalatyn 291-baby boiynsha aiyp taǵylǵan, dep habarlaidy Azattyq radiosy.
1989 jyly týǵan Álibek Imanbekov jýrnalisterge "qylmys jasamaǵanyn, ádiletsiz úkim shyqqanyn" aitty.
Ol buǵan deiin, sottaǵy sońǵy sózinde "tergeý kezinde qysym jasaldy, qarýdy alǵanym ras, biraq ony urlaǵanym joq, sol kúnderi 102-ge habarlasqanymda telefondy kótermedi, dúrbeleń basylǵan soń qaitarý oiymda bolǵan, men bul áreketimdi qylmys dep oilamaimyn, eki balam men 3-shi top múgedektigi bar áielim men zeinet jasyndaǵy ata-anamnyń jalǵyz asyraýshysy bolǵandyqtan otbasymnan aiyratyn jaza bermeseńiz eken" degen edi.
Sot sheshimin túsindirgen sýdia Qairat Imanqulov "Álibek Imanbekov tergeý kezinde qysym jasaldy" deý arqyly ózin aqtap alǵysy keldi. Onyń qarý-jaraq urlaǵany dáleldendi" dedi.
Sotqa on shaqty belsendi men BAQ ókilderi qatysty. Álibek Imanbekovtyń advokaty Gúlnar Jýaspaeva "sot sheshimine kelispeitinin, mindetti túrde shaǵym túsiretinin" aitty.
Álibek Imanbekovtiń ústinen qozǵalǵan qylmystyq is boiynsha sot protsesi 26 mamyrda bastalǵan.
Prokýratýranyń aiyptaý materialynda "Álibek Imanbekov jáne tergeýde anyqtalmaǵan "Baǵlan" esimdi tulǵamen birge ózderiniń ómirlerin eshbir maqsatsyz ótkizip júrgen, jeńil jolmen ózderiniń materialdyq jaǵdaiyn jaqsartý maqsatynda Qazaqstan prezidentiniń jarlyǵymen qańtardyń besinen bastap Qazaqstan aýmaǵynda tótenshe jaǵdai jariialanǵanyna qaramastan urlyq jasaýǵa baǵyttalǵan qylmystyq oilary týyndap, adamdar tobynyń aldyn ala sóz bailasýymen qarý-jaraq satatyn "Qorǵan-TsENTR" dúkenine zańsyz kirý arqyly atys qarýyn jasyryn jymqyrýǵa bel býǵan" dep jazylǵan.
Álibek Imanbekovke eki qarý urlady dep aiyp taqqan. Imanbekov bul aiyppen kelispegen. "Tergeý kezinde qysym jasaldy, qujatqa uryp-soǵyp qol qoidyrdy" degen bolatyn.
Aiyptaý aktisinde "qarý – atýǵa jaramdy" dep jazylǵan. Alaida qarý-jaraq dúkeniniń iesi Dmitrii Nikolenko sot protsesi kezinde "qarý-jaraqty eshkim qoldana almaityndai etip qoiǵanbyz. Oq atylmaý úshin qarý uńǵymalaryna arnaiy qystyrmalar qoiylǵan. Kriminalister sol qystyrmany biraz kúsh salyp alyp tastaǵan da atýǵa jaramdy dep jazyp bergen" degen bolatyn.
Advokat Gúlnar Jýaspaevanyń "ballistikalyq saraptama jasaý jónindegi ótinishe prokýror qarsylyq bildirgen. Advokat Gúlnar Jýaspaeva men aiyptalýshynyń áieli, ári qoǵamdyq qorǵaýshysy Baian Shyrymbekova "iste shikilik kóp" degen. Olar Álibek Imanbekovke taǵylǵan Qylmystyq kodekstiń 291 babyn Qylmystyq kodekstiń 287-babyna aýystyrýdy suraǵan. Qylmystyq kodekstiń 287 baby "Qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý jáne alyp júrý" dep atalady.
Ishki ister ministrliginiń derekterine qaraǵanda, Qańtar oqiǵasynda politsiia basqarmasynan, qarý-jaraq dúkenderinen úsh myńnan astam qarý urlanǵan. Onyń 1400-i tabylǵan. Osy ister aiasynda buǵan deiin birneshe adam sottalǵan.
