QR Bas prokýratýrasy Qyzylorda oblysynda asa aýyr qylmys jasaǵan qańtar oqiǵasynyń bir qatysýshysyna qatysty tergeýdi aiaqtady, dep habarlaidy QazAqparat.
Bul týraly vedomstvonyń 1 qyzmet bastyǵynyń orynbasary Eldos Qilymjanov málim etti.
«Qyzylorda oblysynda asa aýyr qylmys jasaǵan qańtar oqiǵalarynyń bir qatysýshysyna qatysty tergeýdi aiaqtadyq. 5 qańtarda Qyzylorda qalasyndaǵy jappai tártipsizdikter kezinde ol jáne onyń sybailastary Ulttyq ulannyń «Kamaz» júrgizýshisin qatygezdikpen uryp-soqqan. Sodan keiin kúdikti áskeri tehnikany aidap ketip, qozǵaltqysh pedalyna kirpish qoiyp, mashinany áskerilerdiń qorshaýyna baǵyttap, qylmyskerdiń ózi «Kamaz» kabinasynan sekirip ketken, - dedi Eldos Qilymjanov OKQ ótken baspasóz máslihatynda.
Onyń aitýynsha, basqarýsyz qalǵan «Kamaz» úlken jyldamdyqpen kelip áskerilerdi qaǵyp, saldarynan adam qaza tapqan.
«Avtomashina úlken jyldamdyqpen áskerilerdi basyp, nátijesinde soldat M. Qaisarov qaza tapty. Kúdiktiniń áreketi terrorizm aktisin jasaý boiynsha saralandy. M. Qaisarov otbasyndaǵy jalǵyz bala bolǵan, osy jyly ol 20 jasqa tolar edi», - dedi Bas prokýratýra ókili.
