Qańtar oqiǵasy kezinde qaza bolǵan kúsh qurylymdarynyń qyzmetkerleriniń otbasyna páter beriledi. Bul týraly Májilistiń jalpy otyrysynda Úkimet basshysynyń orynbasary Eraly Toǵjanov aitty, dep habarlaidy QazAqparat.
Osy oraida ol baspanamen qamtamasyz etý máselesi Úkimettiń erekshe baqylaýynda ekenin atap ótti.
«Barshasyna belgili, qańtardaǵy qaiǵyly oqiǵalar kezinde kúsh qurylymyndaǵy 19 adam qaza boldy. Olardyń arasynda shekara akademiiasynyń úsh kýrsanty da bar. Qazirgi kezde naqty sheshim bar, iaǵni 13-ine qatysty sheshim qabyldanyp, baspana berildi. Óńir ákimderimen qalǵan alty adamǵa qatysty máseleni talqyladym. Osy oraida kýrsanttarǵa bailanysty kóterilgen másele de nazardan tys qalmady. Sondyqtan bul másele 25 sáýirge deiin sheshiletin bolady», - dedi Toǵjanov depýtattardyń suraqtaryna jaýap bere otyryp.
