Qańtar oqiǵasyna qatysqan 55 adamǵa jeńil jaza taǵaiyndaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Memleket basshysynyń aýyrlatatyn mán-jailar bolmaǵan kezde jazany jeńildetý jónindegi tapsyrmasyn oryndaý maqsatynda prokýrorlar sottardy bas bostandyǵynan aiyrýǵa bailanysty emes jazalardy taǵaiyndaýǵa baǵyttaýda. Sondai-aq protsestik kelisim institýty keńinen qoldanylýda. Bul rásiminiń erekshelikterine jáne olardyń sotta qaralý tártibine toqtalsam, kúdikti aiyptaýǵa, dáleldemelerge, keltirilgen zalalmen daýlaspaǵan kezde jáne jazanyń túri men mólsherimen kelisken jaǵdaida onymen kináni moiyndaý týraly kelisim jasalady. Mundai ister sotta 10 táýlikten aspaityn merzimde qaralady jáne jaza osy baptyń sanktsiiasyndaǵy eń joǵary merzimniń jartysynan aspaidy», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, bul rásim sotta isterdiń tezirek qaralýyna múmkindik beredi. Sottalýshylarǵa standartty formattaǵy isterge qaraǵanda sot protsesine uzaq ýaqyt qatysýdyń qajettiligi joq. Qyzylorda oblysynda 42 qylmyskerge qatysty ister kináni moiyndaý týraly protsestik kelisim jasaý arqyly sotqa joldandy. Olardyń sońynan atalǵan rásim aiasynda Almaty oblysynda 15 adamǵa qatysty qoldanyldy. Aqtóbede – 3, Jambylda – 8 jáne Shyǵys Qazaqstan oblysynda 3 adamǵa qatysty ister sotqa jiberildi.
«Qaraý nátijesinde 55 adamǵa qatysty úkimder qabyldanyp, olar boiynsha bas bostandyǵynan aiyrýǵa bailanysty emes jazalar taǵaiyndaldy. Mysaly, Taldyqorǵan qalasynyń turǵyny «Glock» qarýly pistoletin, oǵan oq-dárilerdi jáne 5 jaryq-dybys granatalaryn urlaǵan. Atalǵan azamat óz kinásin moiyndady jáne jasaǵan isine ókindi. Sondai-aq tergeý barysynda qylmystyq qýdalaý organyna kómek kórsetti. Osy mán-jailardy eskerip, oǵan 3 jyl 6 ai merzimge shartty jaza taǵaiyndaldy», - dedi Bas prokýratýra ókili.
