Kórneki sýret: ashyq derekkózden
Taldyqorǵanda Qańtar oqiǵasyna qatysqan "kúdiktini" óltirip alǵan eks-politsei 10 jylǵa sottaldy. Al osy faktini jasyrǵan áriptesine 4 jylǵa bas bostandyǵyn shekteý jazasy taǵaiyndaldy, dep habarlaidy "Ult aqparat" qalalyq sottyń baspasóz qyzmetine silteme jasap.
Taldyqorǵan qalalyq sotymen abaisyzda jábirlenýshiniń ólimine ákep soqqan azaptaý faktisi boiynsha (146-baptyń 3-bóligi 2022 jylǵy QK redaktsiiasynda), sondai-aq qylmysty jasyrý boiynsha (QK 432-baby) qylmystyq is qaraldy.
2022 jylǵy 8 qańtarda jappai tártipsizdikterge qatysqan degen kúdikpen jábirlenýshi M. politsiia basqarmasynyń qyzmetkerlerimen ýaqytsha ustaý izoliatory (ÝUI - red.) ǵimaratyna jetkizilgen. ÝUI ǵimaratynda óziniń qyzmettik mindetterin atqarǵan sottalýshy B. jábirlenýshige jaraqat keltirip, sońǵysy aýrýhanada qaitys bolǵan. Sottalýshy S. osy aýyr qylmysty jasaý faktisin jasyrǵan.
"Prokýror B.-ny 11 jylǵa bas bostandyǵynan aiyrýdy, S.-ny 3 jylǵa bas bostandyǵynan aiyrýdy surady. Jábirlenýshiniń ókilderi prokýrordy qoldady.
Sottalýshy B. kináni moiyndamady, sottan ony aqtaýdy surady. Al S. kinásin moiyndap, ókindi.
Aiyptalýshylardyń aiyptalǵan áreketterdi jasaýdaǵy kinási is boiynsha jinalǵan dáleldemelermen, kýágerlerdiń aiǵaqtarymen, sot saraptamalarynyń qorytyndylarymen dáleldendi" - delingen habarlamada.
Sot úkimimen B. QK-niń 146-babynyń 3-bóligi boiynsha kináli dep tanylyp, oǵan 10 jyl merzimge bas bostandyǵynan aiyrý jazasy taǵaiyndaldy. Al S.-ǵa QK-niń 432-baby boiynsha 4 jyl merzimge bas bostandyǵyn shekteý jazasy taǵaiyndaldy. Sondai-aq, sottalǵandardan jábirlenýshilerdiń paidasyna 15 mln.teńge somasynda moraldyq ziian óndirildi.
Sot úkimi zańdy kúshine engen joq.
