QR Bas prokýratýrasy 1 qyzmet bastyǵynyń orynbasary Eldos Qilymjanov qańtar oqiǵasy boinysha kúdikti dep tanylǵan 721 adamnyń 281-i qamaýda otyrǵanyn málim etti, dep habarlaidy QazAqparat.
«Jalpy el boiynsha qańtar oqiǵasy kezinde jappai tártipsizdik uiymdastyrý jáne oǵan qatysý boiynsha 721 adam kúdikti dep tanyldy. Onyń ishinde 281 adam qamaýda otyr. Almaty qalasynda 82, Shyǵys Qazaqstan oblysynda 35, Jambyl oblysynda 44, Shymkent qalasynda 43, Qyzylorda oblysynda 36, Atyraý oblysynda 14, Almaty oblysynda 5, Aqtóbe oblysynda 4 adam qamalǵan», - dedi ol ortalyq kommýnikatsiialar qyzmetinde ótken brifingide.
Sondai-aq, ol Shyǵys Qazaqstan oblysynda ekstremistik top múshesi Semeidegi tártipsizdikke qatysqanyn aitty.
«Shyǵys Qazaqstan oblysynyń prokýratýrasy qiratý, múlikti joiý jáne Semei qalasy ákimdigin basyp alý áreketterine qatysýshyny anyqtady. 5 qańtarda atalǵan qylmysker Semei qalasy ákimdiginiń ǵimaratynyń aldynda bir top adammen birge «Gazel» markaly politsiia avtokóligin aýdaryp tastaǵan. Óziniń áreketimen ol basqa adamdardy baýrap alyp, ákimdikti basyp alýǵa shaqyrǵan. Osy óńirde buryn sotty bolǵan ekstremistik uiymnyń múshesi, qańtar oqiǵasynyń basqa qatysýshysy anyqtaldy. Ol daýys kúsheitkish kómegimen Semei turǵyndaryn qosylýǵa shaqyrǵan jáne qala ákimdigin basyp alýdy uiymdastyrýshylardyń biri bolǵan. Onyń áreketteri videoda jazylǵan jáne tártipsizdikterdiń basqa da qatysýshylardyń jaýaptarymen rastalady», - dedi Eldos Qilymjanov.
