Qyzylorda oblysynda qańtar oqiǵasyna qatysqan adamǵa úkim shyqty, dep habarlaidy QazAqparat oblystyq sottyń saityna silteme jasap.
Qyzylorda oblysynyń qylmystyq ister jónindegi mamandandyrylǵan aýdanaralyq sotynda jappai tártipsizdikke qatysty ( 272 b. 2 b.), sondai-aq áskeri qyzmetshiniń ómirine qol suǵýshylyq jasady (380-1 b. 2-b. 1), 6) t.) jáne terrorizm aktisin jasady (255b. 4b.) dep aiyptalǵan Q-ǵa qatysty qylmystyq is qaraldy.
2022 jyldyń 5 qańtarynda sottalýshy Q. «A» saýda úiiniń aldynda jappai tártipsizdikke qatysyp, áskeri qyzmetshi T-ǵa kúsh qoldanǵan.
Onyń basqarýyndaǵy «Kamaz» áskeri kóligin basyp alyp, onyń rýline otyryp, gaz pedalin edenge deiin basyp, kirpishpen tirep, sheginip jatqan áskeri qyzmetshiler sapyna qarai buryp, ózi kólikten sekirip túsken.
Saldarynan júk kóligi áskeri qyzmetshi M-ny basyp, ol alǵan jaraqatynan oqiǵa ornynda kóz jumǵan.
Sottalýshynyń kinási kýálardyń aiǵaqtarymen, qylmystyq is materialdaryna tirkelgen beinejazbalarmen, sondai-aq sot-meditsinalyq saraptama qorytyndysymen dáleldendi.
Memlekettik aiyptaýshy sottalýshyny 20 jylǵa bas bostandyǵynan aiyrýdy surady.
Jábirlenýshiniń ókili - ómir boiyna sottaýdy, al sottalýshynyń advokattary - ony aqtaýdy surady.
Qylmys aýyr jáne asa aýyr qylmystar sanatyna jatady, ony jasaǵany úshin eń joǵary jaza - ómir boiyna bas bostandyǵynan aiyrý.
Qoǵamdyq qaýiptiń sipaty men dárejesin, jaýaptylyq pen jazany jeńildetetin jáne aýyrlatatyn mán-jaidy eskere otyryp, sot Q-ny 17 jylǵa bas bostandyǵynan aiyrdy.
Ol jazasyn qylmystyq-atqarý júiesiniń qaýipsizdigi barynsha joǵary mekemesinde óteidi.
Terrorizm aktisi epizody boiynsha sottalýshy aqtaldy.
Sot úkimi zańdy kúshine engen joq.
