© pixabay.com
Taldyqorǵan qalalyq sotynda jábirlenýshi dep tanylǵan 24 adamdy azaptaý faktisi boiynsha politsiia qyzmetkerlerine qatysty qylmystyq is qaralyp jatyr. Bul týraly Qazaqstandaǵy Adam quqyqtary jónindegi ýákil habarlady, dep jazady Sputnik Qazaqstan.
Jábirlenýshilerdiń ókilderi Adam quqyqtary jónindegi ýákil Elvira Ázimovaǵa tiisti sot tóreligine qol jetkizý bóliginde quqyqtarynyń buzylýyna bailanysty ótinishpen júgingen.
Atap aitqanda, olar óz shaǵymynda jábirlenýshilerdiń múddeleri obektivti jáne sapaly túrde qaralýyna múmkindik joq ekenine, jábirlenýshilerdiń óz ókilderimen qupiia kelissóz júrgizý úshin jaǵdai jasalmaǵanyna, qylmystyq protseske qatysýshylar sanynyń kóp ekenin, al sot zaly tar ekenin aitqan.
Jábirlenýshiler men sottalýshylar bir jerde otyrǵandyqtan, sottalýshylar moraldyq jáne psihologiialyq qysym jasaidy. Sondai-aq aýdarmashynyń jumysyna da shaǵym tústi. Jábirlenýshiler sot protsesinde sinhrondy aýdarma jasaýdy birneshe ret ótingense, ol eskerýsiz qalyp otyr.
Sot talqylaýynyń barysyn baqylaityn adam quqyqtary jónindegi ulttyq ortalyqtyń qyzmetkerleri qylmystyq isti qaraý tártibiniń joq ekenin de atap ótti.
"Quqyq qorǵaý organdary qyzmetkerleriniń kóptegen adamǵa fizikalyq kúsh qoldanǵany týraly qylmystyq istiń airyqsha sipatyn eskere otyryp, Elvira Ázimova Joǵarǵy sotqa sapaly sot tóreligin qamtamasyz etý boiynsha shara qoldaný týraly hatpen júgindi. Ýákildiń ótinishin qaraý nátijesi boiynsha qylmystyq ister jónindegi sot alqasynyń tóraǵasynan barlyq kórsetilgen zańbuzýshylyqtardyń sheshilgeni týraly jaýap kelip tústi", - delingen habarlamada.
Sot organynyń jaýabynan sot talqylaýy úlken zalda ótip jatqany, tiisti aýdarmashymen qamtamasyz etý problemalary joiylǵany habarlanady.
Budan bólek, sottalýshylarǵa qatysty bultartpaý sharasy bóliginde jábirlenýshi taraptyń advokattarynyń shaǵymy ishinara qanaǵattandyryldy.
