QR Bas prokýrory Berik Asylov qańtar oqiǵasynda qurban bolǵandardyń tizimi nege jariialanbai jatqanyn túsindirdi, dep habarlaidy QazAqparat.
«Qurban bolǵandardyń tizimin biz resmi túrde jariialaǵan joqpyz. Ony jariialaýdyń aldynda qurban bolǵandardyń áke-shesheleri men týysqandaryna qosymsha qaiǵy ákelemiz dep oilaimyz. Sondyqtan osy maqsatta biz bul tizimdi resmi túrde jariialaǵan joqpyz», - dedi Bas prokýror Májilistiń jalpy otyrysynda qoiylǵan suraqtarǵa bergen jaýabynda.
Sondai-aq, ol oqiǵa kezinde mert bolǵandardyń qandai sanatatqa jatatyny anyqtalatynyn aitty.
«Al endi 230 adam mert boldy dep aityp kettik. Olar boiynsha kóptegen is qozǵadyq. Adam ólý faktileri boiynsha 94, terrorizm faktileri boiynsha 46 is qozǵaldy. Tergeý kezinde biz mán-jaidyń bárin tekserip, qansha terrorist, onyń kim ekenin, kimniń shabýyl jasaýshy, kimniń beibit turǵyn ekenin tekseris arqyly sheshim qabyldap, ózińizge baiandaimyz», - dedi Berik Asylov.
Májilis tóraǵasy Erlan Qoshanov qaitys bolǵandardyń tizimin jariialaýǵa tergeý amaldarynyń shekteýleriniń áseri bar-joǵyn surady.
«Shekteýler bar. Kimniń kim ekeni tergeýler kezinde zerdelenedi. Sonyń bári anyqtalǵannan keiin biz ony jariialai alamyz», - dedi Bas prokýror.
