Foto: Tengrinews.kz/Álihan Sariev
Memleket basshysy Qasym-Jomart Toqaev Almaty jurtshylyǵymen kezdesýinde qaraly qańtardaǵy oqiǵalardy eske aldy, - dep habarlaidy "Ult aqparat".
«Qasiretti Qańtar elimiz úshin zor synaq boldy. Qasaqana áreket etken qaraqshylar toby memlekettigimizdiń tuǵyryn shaiqaltýǵa tyrysty, eldegi turaqtylyqtyń tamyryna balta shapqysy keldi. Biz bul jerde bir máseleniń basyn ashyp alýymyz kerek. Beibit sherýlerdiń sebebi – bir bólek. Al, memlekettik tóńkeris jasaǵysy kelgenderdiń maqsaty – múlde basqa.
Qańtar oqiǵasynyń astaryna úńilsek, onyń sebepteri aiqyn kórinedi. Elimizde uzaq ýaqyt áleýmettik ádildik nazardan tys qaldy. Memleket pen qoǵamnyń arasy alshaqtap ketti. Jyldar boiy sheshilmegen áleýmettik-ekonomikalyq máselelerden jurt ábden qajydy. Bul – túsinikti jait. Alaida, qylmyskerlerdiń kózdegeni basqa edi. Olar beibit sherýdi jappai tártipsizdikke ainaldyrǵysy keldi. Aldyn-ala ázirlegen arandatýshylar, buzaqylar, tipti qaraqshylardy paidalandy.
Sonyń kesirinen Almatydaǵy jaǵdai kúrt nasharlady, tipti, baqylaýdan shyqty. Qylmyskerler ákimshilik ǵimarattardy basyp aldy. Kóshelerdi jaýyp, jolynda kezdeskenniń bárin qiratty, tonady. Qysqasy, oilaryna ne kelse, sony istedi. Biraq, qandai jaǵdai bolsyn, azamattarymyz, eń bastysy, Almatynyń asqaq rýhyn qulatqan joq. Qala turǵyndary judyryqtai jumyldy, súiikti qalasyn qorǵap qalý úshin birikti. Árine, sodyrlardyń mundaidy kútpegeni aidan anyq»", - dedi Prezident.
Memleket basshysy el taǵdyry synǵa túsken sátte halqymyz myzǵymas birligi men qaitpas qaisarlyǵyn tanytqanyn aitty.
«Elimizdiń altyn besigi – Almatyny qiratyp jatqany osy qalanyń perzenti retinde meniń de janyma batty. Degenmen, dál sol sátte abdyrap, ýaqyt uttyrýǵa esh qaqymyz bolǵan joq. Onda ábden dandaisyp ketken qaraqshylar qalamyzdy kúl-talqan eter edi.
El taǵdyry synǵa túsken jaýapty sátte halqymyz myzǵymas birligi men qaitpas qaisarlyǵyn tanytty. Memlekettigimizdi saqtap qalý úshin biz qandai táýekelge de baratynymyzdy aiqyn kórsettik. Sol qiyn kúnderde búkil Qazaqstan halqy almatylyqtardyń tileýin tiledi. Ókinishke qarai, qazir keibireýler qylmystyq áreketti halyq kóterilisi dep aqtaýǵa tyrysyp júr.
Taǵy da aitamyn: halyqtyń beibit sherýi men qaraqshylar jasaǵan qandy qylmystyń arasyn ajyrata bilý kerek. Biz jedel jáne batyl áreket jasaǵannyń arqasynda el ishinde dereý tártip ornattyq. Qabyldaǵan sheshimderimiz jáne is-áreketimiz búkil dúnie júzinde túsinistikpen moiyndaldy, tipti, qoldaý tapty» - dedi Toqaev.
Sonymen qatar Prezident qylmyskerlerdiń qolshoqpary bolǵan, arandap qalǵan jandarǵa keshirimmen qaraý kerek degen sheshimge kelgenin aitty.
«Ýaqyt – emshi» deidi halqymyz. Qasiretti kúnder alystaǵan saiyn birtindep kómeski tarta beretini anyq. Qarýly toptardyń qalai oiran salǵany da esten shyǵýy múmkin. Biraq biz el ishine jik salǵysy keletin arandatýshylardyń jeteginde ketpeýimiz kerek. Kóshege shyǵyp, buzaqylyq jasaǵan adamdardy dáriptep, qoldan qaharman jasaýǵa bolmaidy. Qastańdyq uiymdastyrǵan qaraqshylardyń qylmysyn aqtaýǵa jol berilmeidi. Olardyń bári laiyqty jazasyn alady.
Biraq, qylmyskerlerdiń qolshoqpary bolǵan, arandap qalǵan jandar da bar. Men aýyr qylmys jasamaǵan osyndai azamattarǵa keshirimmen qaraǵan jón dep sheshtim. Osyǵan orai, Raqymshylyq týraly zań qabyldandy. Bul – adamgershilik turǵydan durys qadam. Óitkeni, keshirim – izgiliktiń belgisi. Qajetti zańdyq rásimder keiin raqymshylyq jasalǵan adamdar bosatylyp, otbasyna oralady.
Budan bylai mundai qasiret qaitalanbaidy dep senemin. Sol úshin biz qoldan kelgenniń bárin jasaimyz. Qaiǵyly kúnderde qaza bolǵan jandardyń jaqyndaryna taǵy da kóńil aitamyn.
Syn saǵatta antqa adal bolǵan quqyq qorǵaý jáne kúshtik qurylymdardyń qyzmetkerlerin erekshe atap ótkim keledi. Qoǵamdyq tártipti qalpyna keltirýge qala turǵyndary da atsalysty. Osyndai janashyr azamattardyń bárine rizashylyǵymdy bildiremin. «Qańtar qasireti» bizge synaq qana emes, úlken sabaq boldy. Tynyshtyq pen turaqtylyqtyń qadirin jurtymyz jete túsindi. Al, qoǵamǵa iritki salýdy kózdegen qaraqshylardyń, lańkesterdiń maqsaty oryndalǵan joq. Kerisinshe, halqymyzdyń birligi nyǵaia tústi. Uiysyp, jan-jaqty jańǵyrý jolyna qadam basty» - dedi Memleket basshysy.
