Búgingi tańda 99 qazaqstandyq zeinetaqy jinaǵyndaǵy qarajatynyń bir bóligin basqarýshy kompaniiaǵa aýdarý týraly ótinim berdi. Bul týraly QR Qarjy naryǵyn retteý jáne damytý agenttigi baǵaly qaǵazdar naryǵyn damytý basqarmasynyń bastyǵy Aleksandr Kamchatnyi aitty, dep habarlaidy QazAqparat.
«Búgingi tańda agenttik tarapynan ruqsat berilgen 6 kompaniianyń úsheýi zeinetaqy jinaqtaryn basqarý boiynsha Biryńǵai jinaqtaýshy zeinetaqy qorymen shart jasasty. Olar - Jysan Invest, Halyk Global Markets, BCC INVEST. BJZQ aqparatyna sáikes, 2021 jyldyń 24 aqpanynda BJZQ-ǵa zeinetaqy jinaqtaryn zeinetaqy portfelin basqarýshyǵa aýdarýǵa 99 ótinish kelip tústi. Aýdarylatyn qarajattyń jalpy somasy 257 mln teńgeden asady», - dedi Aleksandr Kamchatnyi Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, salymshy zeinetaqy aktivterin basqarýǵa jiberetin investitsiialyq portfeldi basqarýshylar tizbesimen, olardyń investitsiialyq deklaratsiialarymen, investitsiialyq portfelderiniń qurylymymen BJZQ saitynynan tanysa alady.
«Sodan keiin onyń investitsiialyq basymdyqtaryna barynsha sáikes keletin bir nemese birneshe basqarýshy kompaniiany tańdai alady», - dedi ol.
