Búgin QR Parlamenti Palatalarynyń birlesken otyrysynda altynshy sailanǵan QR Parlamentiniń úshinshi sessiiasy jabyldy. Kanikýlǵa shyqqan Senat pen Májilis depýtattary kýlýarda jýrnalisterge qaida demalýdy josparlap otyrǵandaryn aitty, dep habarlaidy Baq.kz tilshisi.
Parlament Májilisiniń depýtaty Baqytkúl Hamenova demalysyn qaida ótkizetinin sheshpegenin aitty.
«Aimaqtarǵa baramyz. Jumys saparynan keiin qaida baratynymdy bilmei otyrmyn. Otbasylyq jaǵdaiǵa orai ana bolǵan soń balalardy mektepke daiyndaityn bolamyn», - dedi ol.
Al Hamenovanyń áriptesi Gúljan Qaraqusova bolsa balalardyń tańdaýy boiynsha demalatynyn jetkizdi.
«Josparlarym únemi nemereme bailanysty bolady, sebebi onymen óte sirek jolyǵamyn. Qaida ýaqyt ótkizetinimizdi ata-anasy sheshedi», - dedi depýtat.
Májilismen Omarhan Óksikbaev kanikýlda aimaqtardy aralap, sailaýshylarmen kezdesetinin atap ótti.
«Olarmen birge qoǵamda bar máselelerdi talqylap, Memleket basshysynyń bastamalaryn, zańnamadaǵy jańalyqtardy olarǵa jetkizetin bolamyz. Parlament qabyrǵasynda qabyldanǵan zańdar qanshalyqty sapaly jáne ómir súrý deńgeiin qanshalyqty jaqsartatyny týraly turǵyndardyń ózderinen estigimiz keledi» , - dedi Óksikbaev.
Pavel Kazantsev demalystyń shilde sońynda bastalatynyn, oǵan deiin aimaqtardy aralaitynyn málimdedi. Al demalysyn Qazaqstanda balyq aýlaýmen ótkizbek.
«Kanikýlǵa shyqty dep bári aitady. Kanikýl degenimiz eki ai Parlamenttiń resmi qyzmeti toqtaidy degen sóz, iaǵni jalpy otyrystar, jumys toptarynyń otyrystary bolmaidy. Al bizdiń eńbek demalysymyz shilde aiaǵynda bastalady. Qazir sessiianyń jabylýyna bailanysty sharalar ótken soń 10 kúndei aimaqtarǵa saparǵa shyǵamyz. Odan keiin jeke saparlarǵa ýaqyt bolady. Eski saqaldy týrist retinde ádettegidei balyq aýlaýǵa baramyn. Teńizdi jaqsy kórsem de biyl onda barý josparymda joq. Jazdy Qazaqstanda ótkizip, ózender men kólderge barýdy oilap otyrmyn. Shyǵys Qazaqstanǵa balyq aýlaýǵa, Alakólge shomylýǵa baramyn», - dedi ol.
Maira Aisinanyń qalaýy tek Almaty, sebebi sonda turatyn jaqyn qurbysynyń mereitoiy bolmaq.
«Almatyǵa qatty barǵym keledi, biraq jumys saparymen onda jol túspeiin dep tur. Eń jaqyn qurbymnyń mereitoiy bolǵan soń mindetti túrde Almatyǵa baramyn. Basqa da respýblikadan kóptegen dostarymyz keleiin dep otyr, sol sebepti osy sharany qatty kútip júrmin. Barlyq depýtatta 10 kún ózderiniń densaýlyqtaryn jaqsartyp alýǵa múmkindigi bar, sol sebepten sýy jaqsy dep bári maqtaityn Essentýkige barmaqshymyn. Halyqqa aqyl aitqannan keiin óz elimizde demalǵanymyz durys siiaqty. Eki jumadai Alakólde boldym, ol jaqtaǵy máseleni óz kózimizben kórip keldik. Sol sebepten poiyzdyń, ushaqtyń júrip jatqanyna bizdiń de úlesimiz bar. Kóp depýtattar baryp, ol jerdi kórip kelgennen keiin depýtattyq saýal arqyly komitet otyrysynda aityp, áleýmettik jelini paidalanyp kóp nárseni jasatyp jatyrmyz. Sol sebepten elde júrgenimiz durys dep esepteimin», - dedi Aisina.
Depýtat Shavhat Ótemisov jazǵy demalysyn ázirge josparlamaǵanyn aitty.
«Jumys aiaqtalsyn, eń bastysy ol aimaqtarǵa baryp sailaýshylarmen kezdesýimiz kerek. Sodan keiin baryp qana josparlaimyz. Astana kúni osynda bolamyz», - dedi ol.
