QR Bilim jáne ǵylym ministri Ashat Aimaǵambetov Facebook paraqshasynda koronavirýsqa bailanysty bilim salasynyń aldynda turǵan birqatar máselege nazar aýdartty, dep habarlaidy "Ult aqparat".
«Memleket basshysy Qasym-Jomart Toqaev Úkimetke halyqty koronavirýstyq infektsiiadan qorǵaý sharalaryn kúsheitýdi mindettegenin bilesizder. QR Prezidentiniń tapsyrmasyn oryndaý aiasynda tiisti jumys atqarylýda. Bilim berý uiymdaryna, ministrlikke qarasty mekemelerdiń jumysyna, pedagogter men oqýshylardyń ózara is-qimylyna, oqý protsesin uiymdastyrýǵa qatysty tapsyrmalar kórsetilgen Bilim jáne ǵylym ministrliginiń arnaiy buiryǵy jiberildi», - dep jazdy ministr.
Sonymen qatar ministr birqatar máselege nazar aýdartty.
1. Mektepke deiingi bilim mekemeleri shtattyq rejimde jumys isteýde. Balabaqshaǵa balalardy aparý nemese aparmaý máselesi ata-analarynyń qalaýyna bailanysty. Kelmegeni úshin balabaqshadan shyǵarylmaidy. Iaǵni, balańyzdy balabaqshaǵa aparmasańyz, orny saqtalady. Sondyqtan, ata-analarǵa múmkindiginshe búldirshinderdi úide qaldyrýǵa keńes beriledi.
2. 16 naýryzdan bastap memlekettik qosymsha bilim beretin uiymdardyń qyzmeti toqtatyldy. Oǵan oqýshylar men jasóspirimder saraiy, mýzyka, kórkemsýret, óner mektepteri jáne t.b. jatady. QR BǴM Balalar quqyǵyn qorǵaý komiteti qazirgi jaǵdaidy eskere otyryp, ata-analarǵa balalaryn jekemenshik damytý ortalyqtaryna da aparmaýǵa keńes beredi.
3. 2020 jylǵy 16 naýryzdan bastap 5 sáýirge deiin balalar kóktemgi demalysta bolady. Osy ýaqyt aralyǵynda mektep muǵalimderi qashyqtan jumys isteidi. Áriptesterimiz ádistemelik jáne sabaqqa daiyndyq jumystaryn úide otyryp oryndai aady. Al mektep direktorlary pedagogterdiń qashyqtan jumys isteýi jáne kanikýl kezinde atqarylatyn jumys kólemine sai ailyqty tolyq tóleý týraly aktilerdi qabyldaidy.
Kanikýl aiaqtalǵan soń qajet bolǵan jaǵdaida oqýshylardy qashyqtan oqytý úshin daiyndyq jumysy júrgizilýde. Bul turǵyda arnaiy top aqparattyq júieni kontentpen qamtamasyz etý, pedagogterdi úiretý, servisterdi testileý jáne basqa baǵyttar boiynsha jumys atqarýda. Uiymdastyrý jumystaryn 5 sáýirge deiin aiaqtaýymyz qajet. Bizde birneshe elektrondy platforma bar, qarqyndy jumys júrip jatyr.
4. 16 naýryzdan bastap kolledjder men JOO stýdentteri qashyqtan oqytý tehnologiialary negizinde bilim alýǵa kóshýde. Oqytý protsesi bekitilgen oqý júktemesine, josparyna, baǵdarlamasy men kestege sai júrgiziledi.
5. Oqý protsesin uiymdastyrý úshin pedagogter men stýdentterge elektrondyq platformalarǵa kirýge jaǵdai jasalady. Oqytý quraly retinde video-sabaqtar, derbes onlain-jumys, onlain-kýrstar paidalanylady. Bizde «Bilimland», «Google Classroom», «MOODLE», «Univer», «Platonus», «Canvas», «Daryn.online» syndy jaqsy júieler bar. Sondai-aq «Coursera» óz kýrstaryn tegin usyndy jáne «ZOOM» oqytý barysynda servisti tegin paidalanýǵa jaǵdai jasady.
«Aita keteiin, joǵary oqý oryndary úshin qashyqtan oqytý júiesi jańashyldyq emes. QR BǴM buiryqqa qol qoiǵan sátten bastap, arnaiy tehnologiialardy paidalanyp júrgen keibir JOO onlain-formatta oqytýdy bastap ketti. Tehnikalyq jáne kásiptik bilim berý uiymdarynda qashyqtan oqytýdyń shamaly kúrdeli jaqtary bar. Degenmen de kolledjderdiń basym bóligi tiisti júie boiynsha jumys istep kórgen. Qalǵandary qatarǵa qosylýda. Qazirgi ýaqytta arnaiy júielerge kontent júkteý, OÁK engizý, SBR boiynsha úlken jumys atqarylýda», - deidi ministr.
Kolledjder men joǵary oqý oryndary pedagogteriniń de qashyqtan jumys isteýine jaǵdai jasalaýy kerek. JOO men kolledj basshylaryna osyǵan qatysty tiisti tapsyrma berilgen.
6. Jataqhanalarǵa qatysty saýaldar jetkilikti. Bilet nemese qarjy tapshylyǵy syndy ártúrli jaǵdailarǵa bailanysty qaladan kete almaityn stýdentter jataqhanalarda tura beredi. Biraq olar tek óz bólmesinde bolýy tiis.
7. Pedagogterdiń biliktiligin arttyrý kýrstary onlain-formatta ótkiziledi. Keibir kýrstardyń ótkizý merzimi biylǵy jyldyń ekinshi jartyjyldyǵyna aýystyryldy.
8. Jalpy bilim beretin pánder boiynsha oqýshylardyń respýblikalyq olimpiadasy men aýyl mektepterine arnalǵan «Myń bala» ulttyq ziiatkerlik olimpiadasynyń IV kezeńin jáne basqa da konkýrstardy ótkizý merzimi keiinge shegerildi.
9. Bilim alýshylar men tárbielenýshilerdiń halyqaralyq sporttyq, mádeni, týristik is- sharalarǵa qatysýyna tyiym salyndy. Sondai-aq buqaralyq is- sharalar ótkizýge bolmaidy.
10. Bilim uiymdaryna bilim berýdiń barlyq deńgeileri boiynsha oqý protsesin uiymdastyrý jónindegi QR BǴM ádistemelik usynystary berildi. Qajet bolǵan jaǵdaida olar jańartylyp otyrady.
«Pandemiia kezeńinde kem degende 15 memleket mektepterdi ýaqytsha jabý týraly sheshim qabyldaǵan. Taǵy 14 eldiń belgili bir óńirlerinde orta bilim berý uiymdarynyń jumysy toqtatyldy. Osylaisha, mektepterdi ýaqytsha jabý máselesi Aziia, Eýropa, Taiaý Shyǵys jáne AQSh siiaqty memleketterdi ainalyp ótpedi. Osyǵan bailanysty balalar men stýdentterge bilim berý jáne oqý protsesiniń úzdiksiz jalǵasýyn qadaǵalaý basty nazarǵa alynyp otyr. Bul - bizdiń eldegi bilim berý júiesi úshin úlken syn ári mańyzdy mindet. Alǵa qoiǵan tapsyrmalardy bizdiń pedagogter, ata-analar, oqýshylar men stýdentterimizdiń belsendi atsalysýy arqyly birge oryndaimyz dep senemin», - dep túiindedi sózin Ashat Aimaǵambetov.
