Qazaqstannyń kásipqoi boks federatsiiasy Saýl Alvares «Kanelonyń» dopingpen ustalýy týraly aqparatty teriske shyǵardy, dep habarlaidy QazAqparat tilshisi.
Mamyr aiynda úshinshi jekpe-jek ótkizý týraly da eshqandai kelissóz júrgizilmegen
«Kanelonyń dopingpen ekinshi ret ustalýy týraly aqparat jalǵan. Mundai málimdemeni eshkim jasaǵan joq. Mamyr aiynda úshinshi kezdesý ótkizý týraly aqparatqa da kúmánim bar. Bul týraly «Golden Boy» promoýterleri men Golovkinniń promoýteri Tom Leffler resmi habarlaýy kerek. Eger olar bul taqyrypta sóilesse, bizge habar jeter edi. Ázirge esh habar joq. Úshinshi jekpe-jek týraly eshkim eshqandai kelissóz júrgizgen joq», - dedi QKBF vitse-prezidenti Viktor Demianenko QazAqparat tilshisine bergen suhbatynda.
Vitse-prezidenttiń aitýynsha, soqqylardy esepke alatyn kompiýterlik júieniń esebi resmi derek bolyp sanalmaidy.
«Buǵan deiin de Golovkinniń jeńilgenin aitqanmyn. Bul joly Golovkin sońyna deiin aiqaspady. Onyń bokstasý máneri tóreshilerdiń Kanelonyń paidasyna sheshim shyǵarýyna jetkilikti boldy. Al kompiýterlik júieniń esebi resmi derek bolyp sanalmaidy. Jekpe-jekte otyrǵan tóreshiler árbir raýndty jiti baqylap, nátijesin kórsetti. Muny endi eshkim ózgerte almaidy», - dedi ol.
Sonymen birge, Demianenko «Úshinshi kezdesý bolǵan kúnde de otandasymyzdyń jeńiske jetýi múmkin be?» degen suraqqa jaýap berdi.
«Árine, múmkin. Boks - adam boljai almaityn sporttyń túri. Jeńiske jetý úshin bir soqqynyń ózi jetkilikti. Sondyqtan, munda qos taraptyń daiyndyǵyna qarap boljam ǵana jasai alamyz. Munda da niýanstar kóp, sportshylar jattyǵýda jaraqat alýy múmkin, aýyryp qalýy múmkin. Sondyqtan, qyzyqtyń bári alda», - dedi Viktor Demianenko.
