Prezidenttikke kandidattyń úgit materialdaryn qasaqana zaqymdaǵan elordalyqqa aiyppul salyndy. Bul týraly búgin QR Bas prokýrorynyń orynbasary Bolat Dembaev aitty, dep habarlaidy QazAqparat tilshisi.
«Sonymen qatar prezidenttikke kandidattyń biriniń úgit materialdaryn qasaqana zaqymdaý faktisi anyqtaldy. Bul fakti boiynsha Nur-Sultan qalasynyń turǵynyna QR Ákimshilik quqyq buzýshylyq týraly kodesiniń 134-babymen 15 AEK kóleminde aiyppul salyndy», - dedi Bolat Dembaev QR Ortalyq sailaý komissiiasynyń otyrysynda.
Onyń dereginshe, sottarǵa sailaý boiynsha barlyǵy 11 ótinish túsken.
«Mysaly, kandidat Á.Qosanovtyń shtabyndaǵy eńbek daýy boiynsha 1 adamnyń Qyzylorda oblystyq sotyna 3 ótinishi kelip tústi. Sot olardy qanaǵattandyrýdan bas tartty. Jalpy biylǵy elektoraldyq kezeń quqyqtyq alańda ótip jatyr. Eger prokýratýraǵa túsken ótinishter týraly aitatyn bolsaq, qazirgi ýaqytta olardyń sany 21-ge jetti. Onyń ishinde 13-i sailaý komissiialarynyń quzyretine jatady. Basqa 8 ótinish boiynsha prokýrorlar kandidattyń ózin-ózi usynýy jáne sailaýshyny tirkeý bóliginde túsindirme berdi», - dedi Bas prokýrordyń orynbasary.
Sondai-aq, ol áleýmettik jelide qoǵamdyq suraý salý tártibin buzǵan 3 azamat pen 4 zańdy tulǵa ákimshilik jaýapqa tartylǵanyn aitty.
«Konstitýtsiia jáne zańǵa sáikes prokýratýra zańdylyqtyń saqtalýyna joǵary qadaǵalaýdy júzege asyrady. Ótken sailaýlardaǵydai prokýratýra organdary sailaý zańnamasyn buzý faktileri boiynsha sharalar qabyldady. Búgin saǵat 00-00-de aiaqtalatyn sailaý aldyndaǵy úgit barysynda sanaýly ǵana buzýshylyqtar anyqtaldy», - dedi Bolat Dembaev QR Ortalyq sailaý komissiiasynyń otyrysynda.
Osy rette Bas prokýrordyń orynbasary «QR-daǵy sailaý týraly» Konstitýtsiialyq zańnyń 28-baby 9-tarmaǵyna sai qoǵamdyq pikirge suraý salýdy 5 jyldyq tájiribesi bar zańdy tulǵalar júrgizýge quqyly ekendigin jáne bul týraly OSK-ge aldyn ala jazbasha habarlaý qajettigin aitty.
«Alaida, zańnyń osy normalaryna qaishy jekelegen áleýmettik jeliler men internet resýrstarda paidalanýshylar osyndai saýalnamalar júrgizgen. Osyǵan bailanysty prokýratýra QR-nyń Ákimshilik quqyq buzýshylyq týraly kodesiniń 120-babynyń 3-bóligi boiynsha 3 azamatqa jáne 4 zańdy tulǵaǵa qatysty ákimshilik is qozǵady. Olardyń barlyǵyna sotpen 15 jáne 30 AEK mólsherinde aiyppul salyndy. Osyǵan uqsas faktilerdiń qaitalanylýyn boldyrmaý úshin Bas prokýratýra 8 jáne 23 mamyrda BAQ-ta sailaý boiynsha saýalnama júrgizý tártibin túsindirip, baspasóz habarlamalaryn ornalastyrdy, barlyǵyn zańdylyqty saqtaýǵa shaqyrdy», - dedi ol.
