QR Mádeniet jáne sport ministri Aqtoty Raiymqulova QR Memlekettik týyn paidalanýǵa jol berilmeitin jaǵdailardy túsindirdi, dep habarlaidy "Ult aqparat".
«Qazaqstan Respýblikasynyń Memlekettik týy kólemine qaramastan, ulttyq standartqa sáikes kelýi tiis. Jeke jáne zańdy tulǵalardyń ulttyq standart talaptaryn buzyp, memlekettik týdy paidalanýyna jol berilmeidi. Atap aitqanda, ulttyq standartqa sai kelmeý degenimiz – Memlekettik týdaǵy nysandy, mólsherdi jáne tehnikalyq talaptardy buzý. Memlekettik tý ulttyq standartqa sáikes kelmegen jaǵdaida, QR Úkimeti aiqyndaǵan tártippen aýystyrylyp, joiylýy kerek», - dep atap ótti ministr Ortalyq kommýnikatsiialar qyzmetinde ótken brifingte.
Ákimshilik quqyq buzýshylyq týraly kodekske sáikes, ulttyq standart talaptaryna sáikes kelmeitin memlekettik týdy zańsyz daiyndaǵany úshin ákimshilik aiyppul salynady.
Sonymen birge, jeke jáne zańdy tulǵalar memlekettik týdy mazaq ete almaidy.
Ministrdiń aitýynsha, QR Úkimetiniń 2020 jylǵy 27 qarashadaǵy №801 qaýlysymen QR Memlekettik týyn, eltańbasyn jáne olardyń beinelerin, QR Memlekettik gimniniń mátinin paidalaný qaǵidalaryna ózgerister engizildi. Endigi kezekte bul ózgerister arqyly azamattarymyz úshin Memlekettik týdy paidalaný aiasy zańnamalyq turǵyda keńeitilip otyr.
Eń aldymen QR Memlekettik týyn jeke jáne zańdy tulǵalar ǵimarattarda, onyń ishinde balkondarda jáne saltanatty is-sharalar ótkiziletin oryndarda patriottyq sezimderin, qazaqstandyq biregeiligin bildirý úshin, el azamattarynyń jetistikterin qoldaý maqsatynda paidalana alady.
