Sońǵy ýaqytta Qazaqstan azamattarynyń Armeniiadan kólik alyp kelýi tyiyldy. Bul týraly QR IIM Ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«Úkimet qaýlysyna sáikes, Armeniiadan ákelinetin kólikterdi tirkeý merzimi 2021 jyldyń 1 naýryzyna deiin uzartylǵan bolatyn. Degenmen, sońǵy ýaqytta ol jaqtan kólik ákelý toqtap tur. Óitkeni, shekara jabyq jáne is júzinde syrt elge shyǵý bolmady desek te artyq emes», - dedi komitet tóraǵasynyń orynbasary BAQ ókilderine bergen suhbatynda.
Sonymen qatar ol qai ýaqyttan qazaqstandyqtar ózimen birge kólik júrgizýge ruqsat beretin júrgizýshi kýáligi men tehnikalyq pasportty alyp júrmeýine bolatyndyǵyn túsindirdi.
«Qazirgi ýaqytta bul zań jobasy Májilis qaraýynda jatyr. Ol qabyldanǵannan keiin kóligińiz Qazaqstanda tirkelse, júrgizýshi kýáligin elimizde alsańyz, onda kólik quralyn basqarý úshin sizge ózińizben birge jeke kýáligińizdi alyp júrseńiz jetkilikti bolady. Eger júrgizýshiniń tulǵasyn ne bolmasa atalǵan kólikti anyqtaý qajet bolǵan jaǵdaida jol júrisine qadaǵalaýdy júzege asyratyn politsiia qyzmetkeri elektrondy planshetti paidalanady. Qazirgi ýaqytta bizde shamamen 9 myń elektrondy planshet bar jáne jol júrisin qadaǵalaýǵa jumyldyrylǵan qyzmetkerlerdiń barlyǵy mundai qurylǵymen jabdyqtalǵan», - dedi Serik Túsipov.
