«Áleýmettik meditsinalyq saqtandyrý qorynyń» Nur-Sultan qalasy boiynsha filialynyń direktory Aidar Sitqazinov búgin elorda ákimdiginde ótken baspasóz máslihatynda qandai jaǵdaida emhanany aýystyrýǵa bolatynyn túsindirdi, dep habarlaidy QazAqparat.
«Nur-Sultan qalasyndaǵy emhanalarǵa tirkelgender sany boiynsha kórsetkish ártúrli. Mysaly, №9 emhanada 80 myńnan astam adam tirkelgen. Bar bolǵany 2000 adam ǵana tirkelgen meditsinalyq uiymdar da bar. Tepe-teńdiktiń bolmaýy qala turǵyndarynyń qalaýyna bailanysty: biri úiine jaqyn emhanaǵa tirkelse, endi biri dárigerdi tańdap tirkeledi. Adam kóp tirkelgen emhana soǵan sáikes qarjylandyrylady. Qajet bolǵan jaǵdaida, iaǵni bólingen qarajat igerilmese, qarajat memlekettik-jekeshelik áriptestik aiasynda ózge emhanaǵa aýdarylýy múmkin», - deidi Aidar Sitqazinov.
Ol bir adam jylyna birneshe emhana aýystyra alatynyn aitty.
«Mysaly, 15 qyrkúiekten 15 qarashaǵa deiin basqa emhanaǵa tirkelýge ýaqyt beriledi. Osy ýaqyt aralyǵynd territoriialyq jaǵynan yńǵaily nemese dárigeri kóńilińizden shyǵatyn emhanaǵa aýysa alasyz. Qala ishinde bir aýdannan ekinshi aýdanǵa kóshken jaǵdaida da emhana aýystyrýǵa bolady. Bul jaǵdai belgili bir aiǵa, ýaqytqa qatysy joq», - deidi ol.
Sondai-aq, filial direktory jyl ótken saiyn jeke klinikalar kóbeiip kele jatqanyn aitty.
«Áleýmettik meditsinalyq saqtandyrý qory olarǵa qadam jasap, tirkelgen adam sanyna qarai qarajat bólemiz. Sondyqtan jaǵdaiyńyzǵa qarai qandai emhanaǵa tirkelseńiz de, óz erkińizde, biraq territoriia boiynsha tańdaý qaǵidasyn ustanýyńyz kerek. Sebebi bizde meditsinalyq qyzmetti úige baryp kórsetý túri bar. Iaǵni bes jasqa deiingi bala aýyryp qalsa, aiaǵy aýyr áiel bolsa dáriger úige ózi barady. Eger ózińiz basqa aýdanda turyp, basqa aýdanda tirkelgen emhananyń dárigerin úiińizge shaqyrsańyz, dáriger jumysyn qiyndatasyz», - deidi ol.
Taǵy bir eskeretin jait, emhana azamatty basqa emhanaǵa tirkeýmen ainalyspaidy.
«Basqa emhanaǵa tirkelý úshin ózińiz barýyńyz kerek. Territoriia boiynsha sizge jaqyn jerden jańa meditsinalyq nysan ashylǵan jaǵdaida ǵana emhana sizdi ózi tirkeýi múmkin», - deidi direktor.
