foto:gorvesti.ru
Aqtaýda qandalany ýlaimyn dep 2 birdei sábidiń ólimine sebep bolǵan áiel sottaldy. Búgin Aqtaý qalalyq sotynda 48 jastaǵy áielge qatysty sot úkimi shyqty, - dep habarlaidy Massaget.kz.
Sot ashyq túrde ótip, aiyptalýshy men onyń týystary qatysty. Al jábirlenýshi tarap sot barysyn onlain túrde kórdi.
Aqtaý qalalyq sotynyń sýdiasy Aqmaral Hasenovanyń málimdeýinshe, sottalýshynyń kinási tolyq dáleldengen.
"Sottalýshy Qylmystyq kodekstiń 304-baby 3-bóligimen kináli dep tanylyp, oǵan 5 jyl merzimge bas bostandyǵynan aiyrý jazasy taǵaiyndalsyn. Jazasyn Qylmystyq kodekstiń 46-baby 5-bóliginiń 1-tarmaǵyna sáikes qylmystyq atqarý júiesiniń qaýipsizdigi barynsha tómen mekemelerinde óteý belgilensin. Sottalýshyǵa qatysty bultartpaý sharasy retinde qoldanylǵan úiqamaq buzylsyn. Sot zalynan qamaýǵa alynsyn", - dedi sýdia.
Aita keteiik, qaiǵyly oqiǵa osydan 3 ai buryn boldy. 7-shaǵynaýdandaǵy 14-úidiń 8-qabatyndaǵy páterlerdiń birinde qandalaǵa qarsy dezinfektsiia júrgizilip, páter iesi ony kórshilerge eskertpegen. Saldarynan ýdyń iisi ústińgi qabattaǵy páterge jetip, búkil bir otbasy ýlanyp qaldy. Iiske tunshyǵyp, oqiǵa ornynda 2 jarym jastaǵy jáne 10 ailyq bala qaza tapty. Kámeletke tolmaǵan taǵy 2 bala men ata-anasy jáne atasy aýrýhanaǵa jetkizilip, 6 jasar bala aýyr jaǵdaida jansaqtaý bólimine jatqyzyldy.
Tekserýlerdiń nátijesinde kórshiniń úiinde belgisiz preparatpen dezinsektsiia júrgizilgeni anyqtaldy. Páter iesi qandaladan qutylý úshin 39 tabletka qoldanǵan. Sonyń saldarynan joǵarǵy qabattaǵy páterge ammiak kóp taraǵan.
