Qabyldanatyn zańdardyń shamamen jartysyna túzetýler men ózgerister engizý – bul zańnamamyzdyń turaqsyzdyǵynyń kórsetkishi. Bul týraly Senattyń jalpy otyrysynda depýtat Qanatbek Safinov aitty, dep habarlaidy QazAqparat.
«Parlament aldyndaǵy asa mańyzdy eki mindet – sapaly zań qabyldaý jáne qoǵamnyń ózekti máselelerin sheshý. Muny Prezident aiqyndady. Qandai zańdy sapaly dep ataýǵa bolady? Bul - bir jaǵynan áleýmettik qajettilikterge tiimdi jaýap beretin, al ekinshi jaǵynan durys daiyndalǵan jáne resimdelgen zań. Zań jobasyn ázirleýshiler áleýmettik baǵyt jáne olardyń tiimdiligi máselelerin elemei, zańdy resimdeý men daiyndaýdyń formaldy-quqyqtyq jaǵyna basty nazar aýdardy», - dedi ol «Qazaqstan Respýblikasynyń keibir zańnamalyq aktilerine normashyǵarmashylyqty jetildirý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda qaraý barysynda.
Onyń aitýynsha, quqyq qoldaný praktikasyn taldaý turaqsyz zańdardyń kóp sany, kóptegen ózgerister men tolyqtyrýlar, daiyndalatyn zań jobalarynyń kópshiliginiń qabyldanatyn normalarynyń naqty boljamdarynyń bolmaýy siiaqty problemalardy kórsetedi.
Munyń bári qarama-qaishylyqtarǵa, quqyqtyq qatelikterge, sot daýlaryna ákeledi.
«Senat ótken jyly 110 zań jobasyn qarap, qabyldady. Biraq besinshi jáne altynshy sessiialar ishinde 18 zań jobasy qaitaryldy. Jalpy Qazaqstan Respýblikasynda 2,5 myńnan astam zań qabyldandy. Olardyń 301-i derbes, 90 paiyzy ózgerister men tolyqtyrýlar engizý týraly zańdar jáne ratifikatsiialanǵan halyqaralyq sharttar. Tek qoldanystaǵy normativtik quqyqtyq aktilerdiń sany 51 myńnan astam. Zańdar men zańǵa táýeldi aktilerdiń kóptigi – barlyq qoǵamdyq qatynastardy normativtik retteýdiń kórsetkishi jáne kóbinese memlekettik organdar úshin jańa fýnktsiialar qurýǵa jáne olardyń apparatyn úlkeiýine ákeledi. Bul memlekettik qyzmetkerler úshin de, kásipkerler úshin de keń shekteýler men tyiymdarǵa ákep soǵady», - dedi senator.
Qanatbek Safinovtyń atap ótýinshe, qabyldanatyn zańdardyń shamamen jartysyna túzetýler men ózgerister engizý – bul zańnamamyzdyń turaqsyzdyǵynyń kórsetkishi.
«Ózgeris engizilmegen zań qalmady. Men zań jobasynda osy zańdardyń kóptigin jáne olardyń turaqty ózgeristerin toqtatýǵa baǵyttalǵan tiimdi tosqaýyl tappadym! Alaida zańnamalyq tehnikada mundai quraldar men ádister belgili», - dedi ol.
