Aqtóbege Dimash Qudaibergen keldi. Qytaidaǵy «Singer-2017» án baiqaýynda baq synap jatqan qazaq ánshisin kútip alǵandar arasynda onyń ata-anasy Qanat pen Sveta Aitbaevtar da boldy, dep habarlaidy Ult.kz tilshisi QazAqparat agenttigine silteme jasap.
Dimash Qudaibergendi kútip alý úshin aqtóbelikter bir saǵat buryn halyqaralyq áýejaiǵa jinaldy. Olardyń aralarynda Dimash bilim alǵan mektep pen mýzykalyq kolledjdiń ujymy jáne stýdentter júr. Eriktiler Dimashtyń ánin súisine tyńdap, qoldaý bildirip júrgen múgedek jandardy da ertip ákeldi.
«Dimashty kútip alýǵa oblys ákimi Berdibek Saparbaev pen qala ákimi Iliias Ispanovtyń ózi keldi. Bul úshin alǵys aitamyz. Dimashpen birge «Hunan» telearnasynyń túsirý toby Aqtóbede bolady. Olar erteń Aqtóbe qalasynyń kórikti jerlerin aralap, mektepke, mýzykalyq kolledjge barady. Ony ata-anasy saǵyna kútti», - dedi Dimashtyń ákesi Qanat Aitbaev.
Ulyn kútýge áýejaiǵa Sveta Aitbaeva da kelip, aqtóbelikterge rizashylyǵyn bildirdi.
«Óńir halqyna alǵysymyz sheksiz. Janynda júrgen Alpamys dosyna, Astanada birge oqyǵan barlyq dostaryna alǵys aitamyn. Olar qoldap, únemi janynan tabyldy. Úide atasy men ájesi kútip otyr. Biz shydai almai, áýejaiǵa keldik»,-dedi Svetlana Aitbaeva.
Dimash ózine Djeki Chan syilaǵan kúrtemen Aqtóbege keldi. Janynda bir top telearna qyzmetkeri bar.
«Dimash baiqaýdyń teń jartysynan ótti. Aýyldyń aýasymen tynystaǵan soń qalǵan 7 kezeń oǵan ońai bolady dep oilaimyz»,- dedi Svetlana Aitbaeva.
