Ganalyq boksshy Patrik Allotei qazaqstandyq Qanat Islamnan jeńilgennen keiin kiim aýystyrý bólmesinde jylady, - dep habarlaidy Vesti.kz.
Olardyń jekpe-jegi 29 qazanda Almatyda ótken boks keshiniń basty oqiǵasy boldy. Boksshylar birinshi orta salmaqtaǵy WBA Fedelatin jáne WBO Intercontinental titýldaryna talasty. Jekpe-jek 12 raýndqa sozylyp, qazylar alqasy jeńisti bir aýyzdan Qanat Islamǵa berdi, sóitip, qazaqstandyq chempiondyq belbeýlerdiń iegeri atandy.
Óz kezeginde ganalyq boksshynyń bapkeri Ofori Asari qazylar alqasynyń sheshimine narazylyǵyn bildirdi. Asaridiń aitýynsha, nátije ádiletsiz bolǵan. "Bul - ádiletsizdik. Bul Patriktiń ómirindegi eń mańyzdy jekpe-jegi edi, biraq ádiletsizdik boldy. Mundai jaǵdai esh jerde jáne eshqashan bolmaǵan, mundai bylyqty birinshi ret kórdim. Mundaidan keiin Qazaqstannan alǵan áserim qurydy. Sózim joq", - dep málimdedi Alloteidiń bapkeri.
Qanat Islamnyń ózi bolsa qýanyshyn bólisti. "Óz jerimde, óz halqyma júz paiyz ónerimdi saldym. Qarsylas jaqsy daiyndyqpen kelipti. Judyryqtasý kezinde qolymdy zaqymdap aldym. Kóbi nokaýt kútti, biraq qoldan kelmedi. Alaida, 12 raýndqa sozylǵan jekpe-jek maǵan úlken sabaq boldy. Endi kelesi jekpe-jekterge daiyndalýym kerek", - dedi boksshy.
