Qazaqstandyq boksshy Qanat Islam men Ýolter Kaýtondokva jekpe-jek aldynda salmaq ólshedi, dep habarlaidy QazAqparat.
Qos boksshy da óz salmaqtarynda qaldy – Qanattyń salmaǵy - 71,9 kelini, onyń qarsylasy Ýolter – 71,5 kelini kórsetti.
«Men bul jekpe-jekke daiynmyn. Daiyndyǵym óte jaqsy. Erteń naǵyz boks keshi bolady. Bizdiń basqa da kásibi boksshylar sharshy alańǵa shyǵady. Bizdi qoldańyzdar. Meniń qarsylasym Ýolter - óte tájiribeli. Biraq maǵan óz daiyndyǵym bárinen mańyzdy. Men sońǵy sekýndtarǵa deiin bokstasýǵa ázirmin. Munda bárine daiyn bolýymyz kerek», - dedi Qanat Islam baspasóz máslihatynda.
Óz kezeginde Ýolter Kaýtondokva munda titýl úshin kelgenin basa aitty.
«Men bul titýldy ózimmen birge Namibiiaǵa alyp ketemin. Men ony Qazaqstanda qaldyrmaimyn», - dedi Ýolter.
Erteń, 26 qazanda Balýan Sholaq atyndaǵy sport saraiynda kásipqoi boks keshi ótedi, onda Qanat Islam (26-0, 21 KO) men namibiialyq boksshy Ýolter Kaýtondokva (18-1, 17 KO) negizgi jekpe-jekte judyryqtasady.
Boks keshi aiasynda Dáýlet Dáýkenov, Saparbai Aidarov, Beksultan Raýshanov, Nursultan Amanjolov, Asqar Erýbek, Arman Rysbek jáne Rýslan Myrsataev siiaqty qazaqstandyq boksshylardyń qatysýymen 9 jekpe-jek ótedi. Olardyń qarsylastary - AQSh, Qytai jáne Eýropa elderiniń ókilderi.
