Almatyda Balýan Sholaq atyndaǵy sport saraiynda ótetin boks keshine arnalǵan baspasóz máslihaty ótti. Qazaqstandyq bylǵary qolǵap sheberi Qanat Islam óziniń daiyndyǵy jaiynda aitty, dep habarlaidy QazAqparat tilshisi.
Boks keshinde Qanat Islam orta salmaqtaǵy WBO Inter-Sontinental belbeýi úshin 36 jastaǵy Hýlio de Hesýspen judyryqtasady.
«Erteń álemdegi eń qyzyqty boks keshi bolady dep úmittenemin. Bul ómirde ońai eshteńe joq. Ring - bul ómir. Onda qýanysh pen qaiǵy qatar júredi. Men bir jyldan astam ýaqyt ózimmen jumys istedim, jaraqattan keiin qalpyma kelýge árekettendim. Qazir jańa jattyqtyrýshymen osy is-sharaǵa kópten beri daiyndalyp jatyrmyn. Men bárine daiynmyn. Barlyq qatysýshylarǵa sáttilik tileimin. Qoldaýlaryńyzǵa rahmet», - dedi Qanat Islam.
Qanat Islam óz qarsylasyn joǵary baǵalady.
«Iia, meniń qarsylasym myqty. Ol kóptegen jekpe-jek ótkizdi. Onyń maǵan qaraǵanda rekordtary men nokaýttary kóp. Meniń oiymsha, biz ekeýimiz de boksta qalai bolatynyn bilemiz. Munda jaqsy jáne muqiiat daiyndalǵan boksshy jeńedi. Árine, baq pen bap ta bar. Men halqyma umytylmastai jeńis syilaǵym keledi. Barlyǵy ringte sheshiledi», - dep qosty qazaqstandyq boksshy.
Sondai-aq, ol 69 kg salmaqtan 72 kg salmaq dárejesine aýysýyn aitty.
«Men 2003 jyly 69 kg salmaqpen shyqtym. Osy salmaqta men eki olimpiadaǵa qatystym. Men úshin salmaq qýalaý qiynǵa soqty. Áýesqoi boksta 73 jáne 75 kelige deiingi salmaqpen synaldym. Sondyqtan bul - meniń salmaǵym. Men buǵan deiin osy salmaqta básekelesýdi josparlaǵan edim, ári qarai da qalýdy kózdep otyrmyn», - dep túsindirdi Qanat Islam.
Óz kezeginde, Qanat Islamnyń qarsylasy Hýlio de Hesýs qazaqstandyqty jeńýge daiyn ekenin jetkizdi.
«Iá. Men bárine daiynmyn. Kóp sóilegim kelmeidi. Ispen dáleldegim keledi. Men odan qoryqpaimyn. Ony jeńemin», - dedi Hýlio de Hesýs baspasóz máslihatynda.
Esterińizge sala keteiik, Qanat Islam 2017 jyldyń qyrkúieginde Astana qalasynda ótken boksta kanadalyq Brendon Kýkty toǵyzynshy raýndta nokaýtqa túsirgen bolatyn. Sodan beri ringke shyqpady.
Baspasóz máslihatynyń qorytyndysy boiynsha barlyq qatysýshylar salmaq saltanatynan sátti ótti.
Erteń, 5 shildede Almatyda Balýan Sholaq atyndaǵy sport jáne mádeniet saraiynda boks keshi ótedi, onda Qanat Islam (25-0) WBO Inter-Sontinental ortasha salmaq dárejesi úshin baq synaidy. Bastalýy 17: 30-da.
Týrnirde barlyǵy 10 jekpe-jek bolady, olardyń úsheýiniń ataǵy bar. Qanat Islamnan bólek jekpe-jekke qazaqstandyq Abylaihan Qýsaiynov pen Mádiiar Ashkeev shyǵady.
Uiymdastyrýshylar: Qazaq Promotions pen Almaty qalasynyń ákimdigi.
