Qazaqstandyq boksshynyń menedjeri Nelson Lopes meksikalyq Saýl «Kanelo» Alvaresti chempiondyq jekpe-jekke shaqyrdy, dep habarlaidy QazAqparat.
«Biz qazir álemdik reitingte segizinshi oryndamyz, biraq birinshi bolýymyz kerek. Eger biz chempion bolǵymyz kelse, «Kanelony» jeńýimiz kerek. Qandai ataqqa talasatynymyz mańyzdy emes, sońynda «Kanelony» Qazaqstanǵa ákelgimiz keledi. Biz oǵan qarsy shyǵamyz. Eskerte keteiin, bul jerde maǵan jáne meniń komandama aqsha kerek emes. Biz jekpe-jek ótkizimiz keledi. Bul - meniń ǵana emes, Qanat Islam men Darhan Muhtarbektiń de armany. Biz bul úshin barymyzdy salamyz», - dedi Qanat Islamnyń menedjeri Nelson Lopes .
Sondai-aq, ol eger «Kanelo» joǵary salmaqqa kóterilse, Qanat sol salmaqqa aýysýǵa daiyn ekenin aitty.
«Áýesqoi boksta men 69 jáne 75 keli salmaq dárejesinde judyryqtastym. Jaqynda 69.9 salmaqtan 72-ge aýystym. Qazir bul salmaqta Demetriýs Andrade chempion, biz onymen kezdespedik. Biraq onyń áýesqoi bokstaǵy tehnikasy jaqsy. Onyń qatty soqqysy joq, ol aiaǵymen kóp jumys isteidi. Ony jeńýge bolady. Kanelo týraly aitatyn bolsaq, ol qarapaiym boksshy. Múmkin, ol kóp soqqy jasaityn shyǵar. Biraq, onyń tórt qoly, tórt aiaǵy joq qoi. Men ǵana emes, onymen kez kelgen qazaq 12 raýndqa shydap, judyryqtasa alady. Biz, qazaqtar, ózimizdi baǵalamaimyz, ózgelerdi kótermeleimiz. Biz shetelde jetistikke jetkenderdi ǵana bilemiz. Bizdiń boksshylardyń bári myqty, men solardyń bárin qoldaýǵa shaqyramyn», - dep tolyqtyrdy Qanat Islam.
Buǵan deiin Qanat Islam meksikalyq Saýl «Kanelo» Alvarespen ringke shyǵýǵa daiyn ekenin aitqan bolatyn.
Aita keteiik, 26 qazanda Balýan Sholaq atyndaǵy sport saraiynda kásipqoi boks keshi ótedi, onda Qanat Islam (26-0, 21 KO) men namibiialyq boksshy Ýolter Kaýtondokva (18-1, 17 KO) negizgi jekpe-jekte judyryqtasady.
Boks keshi aiasynda Dáýlet Dáýkenov, Saparbai Aidarov, Beksultan Raýshanov, Nursultan Amanjolov, Asqar Erýbek, Arman Rysbek jáne Rýslan Myrsataev siiaqty qazaqstandyq boksshylardyń qatysýymen 9 jekpe-jek ótedi. Olardyń qarsylastary - AQSh, Qytai jáne Eýropa elderiniń ókilderi.
